«Kúnbaǵys» fılmi eki halyqaralyq festıvalge qatysyp jatyr
NUR-SULTAN. QazAqparat - «Kúnbaǵys» fılmi eki halyqaralyq festıvalge qatysyp jatyr, dep habarlaıdy QazAqparat «Qazaqfılm» kınostýdııasyna silteme jasap.
Rejısser Elıa Gılman túsirgen «Kúnbaǵys» kórkem fılmi Izraılde 6-8 maýsym aralyǵynda ótetin Near Nazareth Festival Halyqaralyq kınofestıvaliniń baǵdarlamasyna qatysady. Fılmdi QR Mádenıet jáne sport mınıstrliginiń tapsyrysy boıynsha «Qazaqfılm» kınostýdııasy «Stalker Sınema» JShS-men birlesip túsirgen.
«Kúnbaǵys» fılminiń oqıǵa jelisi otbasyndaǵy eresek adamdardyń máselesin sheshýge tyrysqan, ınternetke táýeldi 14 jastaǵy jasóspirim týraly baıandaıdy.
«Bul oqıǵa – meniń barlyq ata-analarǵa joldaýym, men sııaqty óz balalaryn tárbıelep otyrǵan, búkil álemdegi analar men ákeler meni túsinedi dep úmittenemin. Jasóspirim bolý, erejelerdiń qysymyna qarsy turý qıyn. Biz balalarymyzǵa jaqyn bolýǵa jáne olardy jaqsy kórý úshin qoldan kelgenniń bárin jasaýymyz kerek», - dedi rejısser Elıa Gılman.
Near Nazareth Festival jyl saıyn dúnıe júzinen rejısserlerdi shaqyryp, álem halyqtary arasynda dostyq qarym-qatynas ornatýǵa járdemdesýdi maqsat etedi. Bul festıvalge ártúrli janrlar men sanattaǵy fılm qabyldanady.
Sonymen qatar «Kúnbaǵys» fılmi Cannes Film Awards halyqaralyq kınofestıvaliniń konkýrstyq baǵdarlamasyna qatysady. Qazaqstandyq kınotýyndy eki nomınatsııa boıynsha usynylady, al festıval qorytyndysy 9 maýsym kúni jarııalanady.
Aıta ketý kerek, búgingi tańda «Kúnbaǵys» kartınasy birneshe halyqaralyq kınofestıvalderdiń júldegeri atandy. Buǵan deıin atalmysh fılm Venice Film Awards festıvalinde «Úzdik rejısser» syılyǵyn; WRPN Women's International Film Festival festıvalinde «Keremet sheberligi úshin» syılyǵyn (2020); White Nights Film Festival baıqaýynda Qazylar alqasynyń arnaıy syılyǵyn (Sankt-Peterbýrg, sáýir, 2021) aldy.
Jýyrda ótkizilgen Istanbul Film Awards halyqaralyq festıvalinde qazaqstandyq fılm aıdyń qorytyndysy boıynsha birden 7 marapatqa ıe boldy: «Úzdik drama», «Áıelder arasyndaǵy úzdik rejısser» (Elıa Gılman), «Úzdik sheteldik fılm», «Úzdik operator» (Alekseı Kırıýhın), «Úzdik bala beınesi» (Rashıd Mýsın), «Úzdik akter» (Erkebulan Daıyrov) jáne «Úzdik aktrısa» (Slaboda Mıhalovıch).
