Kúnbaǵys: Almatyda býllıngke tap bolǵan jasóspirim jaıly fılmniń tusaýy kesildi

ALMATY. QazAqparat - Almatyda dúnıe júzindegi túrli kınofestıvalderde 50-ge jýyq júldemen marapattalǵan «Kúnbaǵys» fılminiń tusaýkeseri ótti. Kınotýyndyny QR Mádenıet jáne sport mınıstrliginiń tapsyrysy boıynsha «Qazaqfılm» kınostýdııasy «Stalker Sınema» kompanııasymen birlesip túsirgen, dep habarlaıdy QazAqparat.

«Kúnbaǵys» — «orta jas» daǵdarysyna ushyraǵan otbasy týraly dramaǵa toly hıkaıa.

Іshki qaıshylyqtarymen áýre bolǵan ata-ananyń qaraýynsyz qalǵan jasóspirim bala úıde de, mektepte de «býllıngtiń» barlyq sumdyqtaryn bastan keship, shettetilgen adamǵa aınalady.

Pana izdegen Ámir qumar oıynǵa táýeldilikke ákeletin kompıýter oıyndary álemine enedi...

Mádenı shara barysynda sóz sóılegen fılmniń qoıýshy rejısseri Elıa Gılman tusaýkeserge kelgen kórermenge alǵysyn aıta otyryp, kartınanyń kınofestıvalderdegi jetistikterimen bólisip, kınotýyndynyń túsirý tobyna júldelerin tabystady.

Osylaısha rejısser Istanbul Film Awards jáne Cannes Film Awards kınofestıvalderinde marapattalǵan «Úzdik akter» juldesin fılmde basty rólderdiń birin somdaǵan akter Erkebulan Daıyrovqa tabystady.

Sondaı-aq basqa da júldelerdi fılmniń jas akteri Rashıd Mýsın, stsenarıı avtory Rasýl Shybyntaı, operator Alekseı Kırıýhın, qoıýshy sýretshi Oksana Azamatova, prodıýserler Gúlsına Mýstafına men Aleksandr Gılman aldy.

Aıta ketsek, jalpy alǵanda osy kúnge deıin «Kúnbaǵys» dramasy 27 halyqaralyq kınofestıvalde túrli nomınatsııalar boıynsha 47 syılyqty qanjyǵasyna baılady.

Fılmde basty rólderdi somdaǵan reseılik akter Kırıll Kıaro jáne serbııalyq aktrısa Sloboda Mıchalovıch atalǵan is-sharaǵa qatysa almaǵandyqtan, beıne jazba arqyly áriptesterin tusaýkesermen quttyqtap, sáttilik tiledi.

Kórsetilimniń aldynda rejısser Elıa Gılman bul fılmdi túsirýge dostarynyń otbasynda oryn alǵan qaıǵyly jaǵdaıdyń túrtki bolǵanyn aıtty.

- Dostarymyz uldarynan aıyrylyp qaldy. Bul oqıǵa maǵan qatty áser etip, nátıjesinde osy fılm dúnıege keldi. Bul oqıǵa – meniń barlyq ata-analarǵa joldaýym, men sııaqty óz balalaryn tárbıelep otyrǵan, búkil álemdegi analar men ákeler meni túsinedi dep úmittenem. Jasóspirim bolý, erejeler qysymyna qarsy turý qıyn. Biz balalarymyzǵa jaqyn bolyp, olardy jaqsy kórý úshin qoldan kelgenniń bárin jasaýymyz kerek, - dedi rejısser Elıa Gılman.

Sondaı-aq rejısser «Kúnbaǵys» fılmi keler jyly sáýir aıynda prokatqa shyǵatynyn habarlady.