Kúnbaǵys tuqymdarynyń zalaldanǵan partııasyn ákelý áreketiniń joly kesildi - AShM
ASTANA. KAZINFORM - Aqmola oblysy Aqkól aýdanynyń aýmaqtyq ınspektsııasynyń ósimdikterdi qorǵaý jáne karantın jónindegi memlekettik ınspektory karantındik ónimniń zalaldanǵan kúıde ákeliný faktisin anyqtady, dep habarlaıdy QR Aýyl sharýashylyǵy mınıstrliginiń baspasóz qyzmeti.
Tekserý barysynda Reseı Federatsııasynan (Krasnodar ólkesi, Krasnodar qalasy) aýdan aýmaǵyna 0,019 tonna kóleminde kúnbaǵys tuqymdary ákelingeni jáne olardyń karantındik obekt — kúnbaǵys fomopsısimen zalaldanǵany anyqtaldy.
Atalǵan karantındik ónimniń ıesine qatysty ákimshilik is qozǵaldy. Materıaldar odan ári qaraý úshin sotqa joldandy.
Osyǵan deıin Qazaqstanda 6 myńnan astam aýyl sýmen qamtylǵany týraly jazdyq.
