Qunanbaı týraly fılm túsirilmek
ASTANA. QazAqparat - Abaı ákesi - Qunanbaı týraly jańa kórkem fılm túsiriletin boldy. Jobaǵa Doshan Joljaqsynov rejısser bolmaq, dep habarlaıdy kinostan.kz.
Túsirilim bıyl 1 shildeden bastap Shyǵys Qazaqstan oblysynyń Abaı aýdanynda júrgiziledi. Fılmge otandyq kınoakterler men Shyǵys Qazaqstandaǵy teatrlardyń ártisteri tartylmaq. Túsirilim jumystary 1 qyrkúıekte aıaqtalady dep josparlanǵan. Fılmniń qashan jaryqqa shyǵatyny belgisiz. Abaıdyń ákesi 1804 jyly belgili bıdiń otbasynda dúnıege kelgen. Ol aqyly men zerektiginiń arqasynda jaqsy saıasatker boldy. Qunanbaı alǵashqyda aýylbasy, bolystyqtan bastap, Qarqaraly ýeziniń aǵa sultany shenine deıin kóterildi. Eske sala ketelik, bul joba D. Joljaqsynovtyń ekinshi rejısserlik jumysy bolmaq. 2009 jyly ol "Birjan sal" fılmin túsirgen edi. Onda basty róldi ózi somdap shyqty.
