«Qunanbaı» fılmi mamyr aıynda kórermenge jol tartady (FOTO)
ASTANA. QazAqparat - Uly Abaıdyń ákesi, qaıratker tulǵa Qunanbaı Óskenbaıuly týraly kórkem fılm osy aıdyń sońynda elimizdiń barlyq kınoteatrlarynan kórsetile bastaıdy. Bul týraly «Qazaqfılm» kınostýdııasynyń bas redaktory, jazýshy Dıdar Amantaı óziniń Feısbýk áleýmettik jelisindegi paraqshasyna jazady.
«Taıaýda Qazaqstannyń halyq artısi, Memlekettik syılyqtyń ıegeri, qazaq mádenıetiniń kórnekti qaıratkeri, óner ardageri, ulttyq teatr jáne kıno akteri, rejısser, prodıýser Doshan Joljaqsynov jurt nazaryna uly Abaıdyń ákesi, qaıratker tulǵa Qunanbaı Óskenbaıuly týraly tolyqmetrajdy kórkem fılmin usynady... 12 mamyrda Qaraýylda, 13 mamyrda Semeıde, 16 mamyrda Astanada, 24 mamyrda Almatyda tusaýy kesiletin bul kınotýyndy kıno álemindegi úlken jańalyq bolady dep oılaımyz», dep jazady kınostýdııanyń bas redaktory. Sondaı-aq ol «Qunanbaı» fılmi mamyrdyń 25-nen keıin elimizdiń barlyq kınoteatrlarynan kórsetile bastaıtynyn atap ótedi. Fılmniń stsenarııin jazǵandar: Doshan Joljaqsynov pen Talasbek Ásemqulov.
