Kún júıesindegi eń tereń shatqal tabyldy
ASTANA. QAZAQPARAT - Plýtonnyń eń iri serigi Haronda asa iri shatqal tabyldy. Bul Kún júıesindegi belgili shatqaldardyń ishindegi eń tereńi bolýy múmkin. Sebebi ol Jerdegi eń úlken shatqal sanalatyn AQSh-tyń uly shatqalynan edáýir tereń ári uzyn. Bul týraly NASA-ǵa silteme jasaı otyryp Lenta.ru habarlady.
Shatqaldyń uzyndyǵy 700 kılometrge jetedi (Úlken shatqaldyń uzyndyǵy 450 kılometrge teń), al tereńdigi - toǵyz kılometr (jerdegiden bes ese úlken). Harondaǵy jartasty qabaq Ýrannyń bes kılometrge jetetin eń iri serigi Mırandaǵa para-par.
NASA usynǵan sýrette uzyndyǵy 300 km bolatyn geologııalyq túzilim ýchaskesi kórsetilgen. Sýret 2015 jylǵy 14 shildede avtomatty New Horizons stantsııasynyń LORRI (Long Range Reconnaissance Imager) ǵylymı qurylǵysymen Haronnan 466 myń kılometr qashyqtyqtan túsirilgen.
New Horizons apparaty 2015 jyldyń 14 shildesinde Plýton men onyń serigine maksımaldy jaqyndaǵan. 2019 jyly stantsııa Koıper beldeýinde ǵalamshardan 1,6 mlrd qashyqtyqta ornalasqan 2014 MU69 planetoıdyna jetedi.
New Horizons-tyń negizgi mindeti - Plýton men onyń serigi Harondy zertteý. Stantsııaǵa ornatylǵan ǵylymı qurylǵy ergejeıli ǵalamsharda magnıtosferanyń bar-joqtyǵy týraly, onyń atmosferasynyń quramy, qabat qurylymy jáne Haronmen ózara baılanysy týraly derekter jınaýǵa arnalǵan.
