Kún sýytqanda tehnogendik órttiń sany artady – TJD

ALMATY. QazAqparat - Aýa temperatýrasynyń tómendeýine baılanysty tehnogendik órttiń tutaný yqtımaldyǵy artady. Bul týraly Almaty qalalyq tótenshe jaǵdaılar departamenti málim etti, dep habarlaıdy QazAqparat tilshisi.

Vedomstva málimetinshe, kún sýytqanda tehnogendik sıpattaǵy tótenshe jaǵdaılar kóbeıedi.

Sondyqtan aqaýly elektr qurylǵylardy paıdalanýǵa jáne olardy qaraýsyz qaldyrýǵa bolmaıdy.

«Jylytý qazandyqtary men peshterin paıdalaný kezinde órt qaýipsizdigi erejelerin saqtańyz. Tútin qubyrlaryn ýaqtyly tazalap, murjadaǵy tútiniń tartylýyn tekserińiz. Janyp jatqan peshti qaraýsyz qaldyrýǵa bolmaıdy. Kishkentaı balalardy úıde jalǵyz qaldyrý óte qaýipti. Peshti qatty qyzdyrmaı, kúnine eki-úsh ret, bir jarym saǵattan asyrmaı ot jaǵý usynylady»,- dep habarlady departamentten.

Sonymen qatar, tótenshelikter bir jelige birneshe elektr qurylǵylaryn qospaýǵa keńes berdi.

Óıtkeni elektr jelisiniń shamadan tys júktelýi qysqa tuıyqtalýǵa jáne órtke ákelýi múmkin.

Tótenshe jaǵdaı týyndaǵan kezde 101 nemese 112 jedel qyzmet telefonyna qońyraý shalý qajet.