Kún sýytsa da, jylý joq: Óskemen turǵyndary jylý qashan beriledi dep kútip júr

ÓSKEMEN. KAZINFORM — Óskemen qalasynyń turǵyndary úılerine jylý berilmeı kele jatqanyna narazylyq bildirdi.

Byltyr Óskemende jylytý maýsymy 26 qyrkúıekte bastalǵan bolatyn. Al bıyl kún sýyp ketse de jylý berilmeı keledi.

Sınoptıkterdiń boljamyna sáıkes, aldaǵy kúnderi qalada aýa raıy salqyn ári jaýyndy bolady. Turǵyndar bolsa, túnde tońyp júrgenderin aıtyp jatyr.

— Kún sýytyp ketti. Kóshede jurttyń bári qalyń syrt kıimderin kıip júr. Al jylytý maýsymynyń bastalatyn túri joq. Osy aptada kún odan saıyn sýytady dep jatyr. Al jylý nege berilmeı keledi? — deıdi Áıgerim esimdi qala turǵyny.

Jylytý maýsymyn bastaý týraly sheshimdi jergilikti atqarýshy organ jylýmen jabdyqtaýshy kásiporynmen birge syrtqy aýa temperatýrasynyń tómendeýine qaraı qabyldaıdy.

— Osy aptada ákimdikte jylý maýsymyna baılanysty jınalys ótedi. Sol kezde jylýdyń naqty qaı ýaqytta qosylatyny belgili bolady, — dep habarlady Óskemen qalasy ákimdiginen.

Eske salsaq, osyǵan deıin Rıdderde jylý berile bastaǵany habarlanǵan.