Kún saıyn bireýdiń para úshin qamalǵanyn estımiz - senator
ASTANA. QazAqparat - QR Parlamenti Senatynyń depýtaty Birǵanym Áıtimova sybaılas jemqorlyqpen kúres jumysyna erekshe kóńil bólý qajettiligi týraly aıtty, dep habarlaıdy QazAqparat tilshisi.
Onyń pikirinshe, sybaılas jemqorlyqtyń saldarymen kúresý jetkiliksiz, oǵan negiz bolatyn alǵysharttardy joıý kerek.
«Kún saıyn sybaılas jemqorlyq úshin bireýdiń qamaýǵa alynǵanyn estıtin boldyq. Óz memlekettik qyzmetshilerimizdi qorǵaıyq ta, bul bizdiń adamdar, bizdiń elimiz, bizdiń bolashaǵymyz. Eshkim para alýǵa umtylmaıtyndaı, eshkim eshkimdi ustap bermeıtindeı jaǵdaı jasaýymyz kerek. Bir kezderi bar kináni para alatyn aǵalar men apalarǵa jabatyndar boldy. Jıyrma jyl boldy, bıýdjettiń qarjylyq resýrsyn bóletin jerde ondaı aǵa-apalar joq. Endi senderdiń býyndaryń munymen aınalysyp keledi. Biz qartaıǵanda kómekke júginetin elimizdiń jas býyndary aınalsyp jatyr. Sondyqtan, memlekettik qyzmetshini barynsha qorǵaýymyz kerek», - dedi B. Áıtimova Astanada Sybaılas jemqorlyqqa qarsy is-qımyl máseleleri boıynsha azamattyq bastamalardyń 2-shi kongresinde.
Sondaı-aq, Parlament ókili onsyz da tapshy bolyp otyrǵan memlekettik qyzmetshilerdiń azaıyp ketýi múmkin ekenin basa aıtty.
«Keı oblys ákimderi aıtyp júr, ońtústikte memlekettik qyzmet úshin adamdar kezekte tur, al soltústikte kerisinshe - jaqsy maman tapshy. Taǵy bir oblystyń ákimdiginde birde-bir qyzmetker joǵary laýazymǵa kóterile almaıdy, sebebi olardyń sógisten amany joq. Meniń oıymsha, biz jemqorlyqpen kúres degen osy eken dep, bárin japatarmaǵaı jazalap jibergen sııaqtymyz. Olar mundaı túsinikpen týmaıdy ǵoı. Sondyqtan sybaılas jemqorlyq túsinigine naqty saı keletin sharalardy ázirleýimiz kerek», - deıdi senator.
Foto: sputniknews-uz.com
