Kún saıyn Astana kóshelerin tazalaýǵa 500 jumysshy jumyldyrylady
ASTANA. QazAqparat - Astana qalasyn kórkeıtý jumysyna qalalyq kommýnaldyq qyzmet ókilderi de súbeli úles qosatyny belgili. Kún saıyn qala kóshelerin tazalaý jumystaryna 500 adam tartylady, dep habarlady qalalyq ákimdiktiń baspasóz qyzmetinen.
Atap aıtqanda, «Almaty» aýdanynda 135 adamnan turatyn 5 brıgada, «Saryarqa» aýdanynda 155 adamdyq 5 brıgada jáne «Esil» aýdanynyń 5 brıgadasynda 184 adam jumys isteıdi. Jumysshylar tań atysymen óz sharýalaryna kirisedi. «Astana Tazalyq» JShS jaz maýsymynda kóshelerdi tazalaý, abattandyrý, jol boıyn jýý, qoqystardy shyǵarý sııaqty jumystardy atqarady. Atap aıtqanda, jol jıekterine sý shashý jumystary aptap ystyq kezinde ǵana júzege asyrylady. Sol arqyly joldaǵy shańnyń azaıýy qamtamasyz etiledi. Jalpy, jaz ýaqytynda kóshelerdi tazalaý jumystaryna qalanyń úsh aýdany boıynsha mamandandyrylǵan tehnıkanyń 160 birligi jumyldyrylady. Sonyń ishinde, jýý qurylǵylary, jol sypyrýǵa, sý shashýǵa arnalǵan tehnıkalar, júk tıegishter men júk tasymaldaǵyshtar da bar. Aıta keteıik, kommýnaldyq qyzmet ókilderi úshin jumys kúni tańǵy saǵat 6-dan bastalady.
