Kún saıyn Astana aýlalarynda 8 myń tekshe metr shamasynda qar tazalanady
ASTANA. QazAqparat - Kún saıyn Astana aýlalarynda 8 myń tekshe metr shamasynda qar tazalanady. Ásirese, bilim berý mekemeleri, densaýlyq saqtaý nysandary men turǵyn úıler aýmaqtaryna erekshe kóńil bólinedi, dep jazady astana.kz.
Merdigerlik uıymdar turǵyn úılerdiń ishki kirý joldary men ótpelerdegi muz ben qardy tazalaıdy. Astana qalasynyń Almaty aýdany boıynsha kún saıyn 2500 tekshe metr, Esil aýdanynda 4 myń tekshe metrden astam, Saryarqa aýdany boıynsha 1500 tekshe metrden artyq qar shyǵarylady. Sondaı-aq, uıymdar ózderi ornalasqan aýdandar boıynsha mektep, balabaqsha jáne densaýlyq saqtaý nysandarynyń terrıtorııasynda tazalyq júrgizedi. Astana qalasynyń aýdandary ákimdikteriniń aqparaty boıynsha, qys maýsymy bastalǵaly beri Almaty aýdanynda 600 myń tekshe metr shamasynda, Esil aýdanynda 130 myń tekshe metrden astam, Saryarqa aýdanynda 78 myń tekshe metrden artyq qar tazalanǵan. 2013-2014 jylǵy qar tazalaý kezeńindegi kórsetkishter boıynsha, Almaty aýdanynda 132 myń tekshe metr, Esil aýdanynda 135 myń tekshe metr, Saryarqa aýdanynda 105 myń tekshe metr qar tazalanǵan. Qalanyń árbir aýdanynda merdigerlik uıymdar qar shyǵaratyn arnaıy polıgon ornalasqan.
