Kún saıyn 100-150 adamnyń baspana máselesin sheship otyrmyz - Lázzat Ibragımova

ASTANA. QazAqparat - «Qazaqstannyń Turǵyn úı qurylys jınaq banki» 2018 jyly 38 myńnan astam adamǵa baspana alýǵa zaem berdi. Bul týraly búgin Úkimet úıindegi baspasóz máslıhatynda «Qazaqstannyń Turǵyn úı qurylys jınaq banki» AQ basqarma tóraǵasy Lázzat Ibragımova aıtty, dep habarlaıdy QazAqparat tilshisi.

«2018 jyly bizdiń bank arqyly kún saıyn 100-150 adam baspana máselesin sheship otyrdy. Jalpy ótken jyl bizdiń bank úshin rekordtyq jyl boldy. Bank 38 250 zaem berdi. Bul 38 myńnan astam qazaqstandyq baspanaly boldy degen sóz. Ár tórtinshi zaem «Nurly jer» memlekettik turǵyn úı baǵdarlamasy boıynsha berildi»,- dedi ol.

Onyń aıtýynsha, «Nurly jer» baǵdarlamasy arqyly úsh jyldyń ishinde 100 mlrd teńgeniń zaemi berilgen. Bul rette 2018 jyly 8 659 bank salymshylary men kezekte turǵan azamattar qonys toıyn toılady.

«Qazirgi ýaqytta qorjynymyzda 1 mln 200 myńnan astam depozıt bar. Onyń ústine 150 myńnan astam salymshy - jergilikti atqarýshy organdarynda kezekte turǵan azamattar», - dedi Lázzat Ibragımova.