Kún saıyn kámeletke tolmaǵandar arasynda shamamen 5 qylmys jasalady - Dınara Zákıeva

ASTANA. KAZINFORM – QR Bala quqyqtary jónindegi ýákil Dınara Zákıeva mektep oqýshylary arasyndaǵy qatygezdik oqıǵalaryna qatysty pikir aıtty.

- Kún saıyn elimizde kámeletke tolmaǵandar arasynda shamamen 5 qylmys anyqtalyp otyrady. Balalar arasynda qylmystardyń jasalýy sebebine toqtalsaq, olar negizinen býllıngke, urlyq, sondaı-aq ekonomıkalyq sıpattaǵy áreketterge qatysty. Bul rette, osyǵan yqpal etken faktorlarǵa nazar aýdarsaq, osy balalar ata-anasynyń nazarynan nemese qamqorlyǵynan tys qalǵan. Munymen qosa, ózderi zorlyq-zombylyq kórgen jáne osyndaı oqıǵalardyń kýágeri bolǵan jetkinshekter de keıinnen zańsyz áreketterge baryp jatady. Sondyqtan qabyldanǵan zańǵa sáıkes, aldyn alý is-sharalary qarastyrylǵan. Osy oraıda qurylǵan mobıldi toptarǵa qıyn jaǵdaıdaǵy otbasylardy, zorlyq-zombylyq áreketteri bar otbasylardy anyqtaý mindeti júktelgen. Máselen, maýsym aıynan beri 45 myń otbasy anyqtalyp, 1800 otbasy jan-jaqty súıemeldeý jumystarymen qamtylyp otyr, - dedi D.Zákıeva Parlament Májilisinde tilshiler suraǵyna jaýap bere otyryp.

Onyń aıtýynsha, otbasylardy qoldaý ortalyqtary ashyldy. Qazir óńirlerde osyndaı 112 ortalyq jumys istep tur, endi taǵy 109-y iske qosylady.

- Sondyqtan atalǵan profılaktıkalyq normalar otbasylarmen jumysta mańyzdy ról atqarady. Ekinshiden, qyrkúıek aıynan beri mektepterde qaýipsizdik sabaǵy engizildi. Bul sabaqta 130 taqyryp qamtylǵan. Olardyń ishinde balalarǵa jaýapkershilik máselesi túsindiriledi, - dedi Bala quqyqtary jónindegi ýákil.

Buǵan deıin balalar ombýdsmeni Dınara Zákıeva Almaty oblysyndaǵy mektep-ınternattyń jaǵdaıymen tanysqanyn jazǵan edik.

Byltyr jeltoqsan aıynda ol 12 jasqa deıingi balalardy úlkenderdiń qaraýynsyz qaldyrýǵa zańdy túrde tyıym salý týraly bastama kóterdi.