Kún saıyn 2 myńnan asa adam elorda kitaphanalaryna barady
ASTANA. KAZINFORM — Astanada kitaphana oqyrmandarynyń qatary jyl saıyn artyp keledi. Byltyr kitaphanalarda 91 myń oqyrman tirkelse, 2024 jyly bul kórsetkish 85 myńǵa jýyq bolǵan. Osylaısha, oqyrmandar sany bir jylda 7%-ǵa ósken, dep habarlaıdy elorda ákimdiginiń resmı saıty.
Sonymen qatar kitaphanalarǵa jyl saıyn kelýshilerdiń jalpy sany 900 myńǵa jetti. Osylaısha, elordalyq kitaphanalar kúnine orta eseppen 2,5 myńǵa jýyq kelýshini qabyldaıdy. 2026 jyly qalalyq kitaphanalar jelisiniń turaqty oqyrmandarynyń sanyn 100 myń adamǵa jetkizý josparlanyp otyr.
2023 jyldan bastap qalada kitaphana ınfraqurylymyn kezeń-kezeńimen jańǵyrtý júrgizilýde. 2023-2025 jyldary jumys istep turǵan 18 kitaphana jańǵyrtylyp, 7 jańa buqaralyq jáne balalar kitaphanasy ashyldy. Nátıjesinde mekeme jelisi 18-den 25 kitaphanaǵa deıin ósti.
— Qazir Astana qalasy ákimdiginiń «ortalyqtandyrylǵan kitaphana júıesi» KMM qurylymyna Muhtar Áýezov atyndaǵy ortalyq qalalyq kitaphana, Ortalyq balalar-jasóspirimder kitaphanasy, 14 buqaralyq kitaphana, 8 balalar kitaphanasy jáne zaǵıp jáne nashar kóretin azamattarǵa arnalǵan mamandandyrylǵan kitaphana kiredi. Jalpy kitap qory shamamen 900 myń danany quraıdy, — deıdi Astana qalasy ákimdiginiń «ortalyqtandyrylǵan kitaphana júıesiniń» basshysy Gúlbadam Mádibaeva.
Gúlbadam Saqtapqyzynyń aıtýynsha kitaphanalardyń syrtqy kelbetin ǵana emes, olardyń qyzmetiniń mazmunyn da ózgergen. Jańartylǵan kitaphanalar kópfýnktsıonaldy mádenı-bilim berý keńistigi retinde jumys isteıdi. Onda zamanaýı oqý zaldary, kovorkıng-aımaqtar, ınteraktıvti jáne mýltımedııalyq alańdar, jeke jáne toptyq jumys, balalar men jastardy oqytý jáne shyǵarmashylyq damytý úshin arnaıy oryndar belgilengen. Kitaphanaǵa kelýshilerge ınternet, elektrondyq resýrstarǵa jáne aqparattyq-bıblıografııalyq qyzmetter alý úshin barlyq jaǵdaı qarastyrylǵan.
— Oqyrman úshin barlyq múmkindikter jasalǵan. Bul jaǵynan eshqandaı
másele joq. Oqýdy ilgeriletýge, ulttyq mádenı murany saqtaýǵa, qazaq ádebıetin, tarıhyn jáne memlekettik tilin dáripteýge erekshe kóńil bólinedi. Ádebı kezdesýler, kitap kórmeleri, pikirtalas alańdary, zııatkerlik oıyndar, shyǵarmashylyq sabaqtar, kásiptik baǵdarlaý is-sharalary jáne medıa saýattylyqty damytý boıynsha jobalar ótkiziledi. Ulttyq kitap kúni, KitapFest, «Abaı oqýlary», «Bir el — birkitap», «Meniń Qoltańbam», «Juldyzdy qitaphanashy», «Ertegi — el erteńi» jobalary da iske asýda. Sonymen qatar kitaphana qyzmetteriniń qoljetimdiligin arttyrý úshin jumys rejımi uzartyldy. Muhtar Áýezov atyndaǵy ortalyq qalalyq kitaphana 23:00–ge deıin, Ortalyq balalar men jasóspirimder kitaphanasy 21:00–ge deıin jumys isteıdi, — dedi kitaphana basshysy.
Іzdenimpaz oqyrmandardyń qatary tolyǵyp, elorda kitaphanalaryna degen suranys artyp keledi.
Budan buryn Abaı atyndaǵy kitaphananyń jobasy AQSh elshileri qory baǵdarlamasynyń jeńimpazy atanǵanyn jazdyq.
