Kún sáýlesinen keıin Jerge magnıttik daýyl soqty
ASTANA. KAZINFORM — 15 aqpanda Jerde aıdyń ekinshi magnıttik daýyly bastaldy, ol eki kúnge deıin sozylýy múmkin. Bul týraly Reseı ǵylym akademııasynyń ǵaryshtyq zertteýler ınstıtýtynyń Kún astronomııasy zerthanasy habarlady.
Bul qubylysqa Jerge qarama-qarsy ornalasqan Kúndegi úlken tájdik tesik sebep boldy.
Alǵashqy daýyl 5 aqpanda tirkelgeni habarlandy. Jalpy, 2026 jyldyń aqpan aıy tynysh. Qańtar magnıttik daýyldar bolatyn kúnder sany boıynsha 10 jyldyq rekord ornatqany, belsendiliktiń basym bóligi aıdyń ekinshi jartysynda bolǵany buryn habarlanǵan bolatyn.
Sondaı-aq 15 aqpanda bastalǵan geomagnıttik buzylýlar kezeńi eki kúnge deıin sozylýy múmkin. Biraq onyń áseri birqatypty bolmaıdy: tolqyndar men qysqa merzimdi daýyldar salystyrmaly túrde tynysh «jasyl» kezeńdermen almasady.
Aıta ketý kerek, kúshti geomagnıttik daýyldar spýtnıkterde, navıgatsııalyq júıelerde, radıobaılanystarda, elektr jelilerinde úzilis týdyrýy múmkin, sondaı-aq aýa raıyna sezimtal adamdardyń densaýlyǵyna áser etedi.
Jyl basynan beri magnıttik daýyl 3 qańtar túni, 11 qańtar, 20 qańtar men 5 aqpan túni tirkelgenin jazǵan bolatynbyz. Bul búkil 25-shi kún tsıklindegi jáne 2017 jyldyń qyrkúıeginen bergi eń joǵary kórsetkish.