Kún sanap qatary azaıyp bara jatqan ardagerler týraly zańdy tezirek qabyldasaq ıgi - Q. Aıtahanov
ASTANA. 20 maýsym. QazAqparat - Ardagerler týraly zańdy tezirek qabyldasaq ıgi.
Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanov osylaı málim etti.
Depýtattyń aıtýynsha, 2005 jyly engizilgen«Ardagerler týraly» zań jobasy Parlamentte 7 jyl boıy qaralyp, ótken jyly Úkimetke qaıtarylǵan bolatyn. «Búgingi tańda kún sanap qatary azaıyp bara jatqan Uly Otan soǵysy ardagerleriniń sany respýblıka boıynsha 8061 adamdy, al olarǵa teńestirilgen adamdar sany 230 myń adamdy quraıdy eken. Bulardyń deni halyq arasyndaǵy birlikti, tatýlyqty saqtaýǵa, táýelsizdikti nyǵaıtýǵa óz úlesterin qosyp, jastar arasynda tárbıe jumystaryn júrgizip keledi, áli de júrgize beredi. Óıtkeni ómirlik tájirıbeni jas urpaq kádesine jaratsam degen nıet olardyń basty armany», - deıdi senator.
Onyń aıtýynsha, jarqyn bolashaq úshin qolyna qarý alyp Otan qorǵaǵan soǵys ardagerlerine, janqııarlyqtyń úlgisin kórsetken tyl eńbekkerlerine qurmet kórsetý - bizdiń basty paryzymyz. Olarǵa qandaı qurmet kórsetsek te laıyq.
«Sondyqtan jas memleketimizdiń aǵa býynnyń qadir-qasıetin ardaqtaý maqsatynda, olardyń quqyǵyn qorǵaıtyn jáne qamqorlyq jasaýdy, áleýmettik kómekter kórsetýdi kózdeıtin «Ardagerler týraly» zańnyń jobasy ázirlense jáne tezdetip Parlamentke engizilse ıgi», - dedi Q. Aıtahanov.
