Kún raıynyń qolaısyzdyǵynan qozǵalys shektelýin eskermeı jolǵa shyqqandar 15 táýlikke qamalady

ASTANA. QazAqparat – Kún raıynyń qolaısyzdyǵyna baılanysty jarııalanǵan eskertýdi elemegender 15 táýlikke qamalady. «Joldarda kólik quraldarynyń júrisin toqtatý nemese ýaqytsha shekteý qaǵıdalaryn bekitý týraly» Úkimet qaýlysyna osyndaı ózgeris engizildi, dep habarlaıdy QazAqparat tilshisi.

«Jol júrisi qaýipsizdigin qamtamasyz etý jónindegi ýákiletti organnyń zańdy talaptaryna baǵynbaý faktileri anyqtalǵan jaǵdaılarda, kólik quraldarynyń júrgizýshilerine Qazaqstan Respýblıkasynyń Ákimshilik quqyq buzýshylyq týraly Kodeksiniń 667-babyna sáıkes sharalar qabyldanady», - delingen qujatta.

Kodekstiń sáıkes baby polıtsııa qyzmetkerleriniń zańdy ókimine baǵynbaǵandarǵa qatysty qoldanylady.

«Quqyq qorǵaý organy nemese arnaýly memlekettik organ, áskerı polıtsııa organy, memlekettik feldegerlik qyzmet qyzmetkeriniń (áskerı qyzmetshisiniń), sot oryndaýshysynyń zańdy ókimine baǵynbaý, olardyń qyzmetine kedergi keltirý eskertý jasaýǵa nemese 30 AEK (91 890 teńge) mólsherinde aıyppul salýǵa, ne 15 táýlikke deıingi merzimge ákimshilik qamaqqa alýǵa alyp keledi», - dep kórsetilgen Kodekstiń jańa redaktsııasynda.

Polıtsııa eskertpesin elemeı, bir jyl ishinde osyndaı áreketin qaıtalaǵan júrgizýshiler 20 táýlikke deıin qamaýǵa alynady. Al, qamaýǵa alynbaıtyndar (múmkindigi shekteýli adamdar) sanatyndaǵylarǵa 50 AEK (152 150 teńge) mólsherinde aıyppul salynady.

Eske salsaq, 11 shildede Memleket basshysy «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.