Kún raıyna baılanysty birneshe oblystyń oqýshylary sabaqty onlaın oqıdy

ASTANA. KAZINFORM – Aýa raıynyń qolaısyzdyǵyna baılanysty 9 aqpan kúni Aqtóbe, Qaraǵandy, Pavlodar oblystarynyń oqýshylary sabaqty qashyqtan oqıdy. 

Aqtóbede aýa raıyna baılanysty oqýshylar taǵy da sabaqty onlaın oqıtyn boldy.

Aqtóbe oblystyq Bilim basqarmasy basshynyń orynbasary Dına Jamanbaevanyń aıtýynsha, aýa raıyna baılanysty oqýshylar men kolledj bilim alýshylary erteń qashyqtan oqıdy.

Aqtóbelik balalar sársenbi, beısenbi kúnderi de onlaın bilim aldy. Sonymen birge qaýipsizdik úshin kolledjdiń stýdentteri de úıde otyryp, muǵalimmen baılanysqa shyqty. Aıta keteıik, oblys boıynsha 400-den astam bilim ordasy bar. Onda 180 myńnan astam bala bilim alady. 

Eske salsaq, Aqtóbedegi boran sársenbi kúni bastaldy. Eki táýlik ishinde júzdegen adam evakýatsııalanyp, qutqaryldy.

Qaraǵandy qalasynyń bilim bólimi habarlaǵandaı, 9 aqpan kúni aýa raıynyń qolaısyzdyǵyna baılanysty birinshi aýysym 0-11 synyp oqýshylary sabaqtaryn qashyqtan oqýǵa kóshiriledi.  

Pavlodar oblysy aýmaǵynda da boran ári qatty jel kútilýine baılanysty, oqýshylar onlaın oqıdy.

Aımaqtyq bilim berý basqarmasy baspasóz qyzmetiniń málimetinshe, 9 aqpan kúni aýa raıynyń qolaısyzdyǵyna baılanysty birinshi jáne ekinshi aýysymnyń 0-11-synyp oqýshylary jáne 9-synyptan keıin túsken 1-2-kýrs kolledj stýdentteri qashyqtan oqytý formatyna aýystyrylady.