«Kún ot bop tur»: Qyzylordada jaryqtyń jıi óshýine baılanysty shaǵym kóbeıdi
QYZYLORDA. KAZINFORM — Áleýmettik jelide Qyzylorda qalasynyń turǵyndary tarapynan aptap ystyqta jaryqtyń álsin-álsin óshýine baılanysty shaǵym jıiledi.
Munda qazir kún kúıip tur. Kóleńkeniń ózinde mı qaınatardaı ystyq. Elektr energııasynyń jıi sónýi onsyz da úı-jaılarda salqyndatqyshtyń kómegimen ǵana amaldap otyrǵan halyqtyń ashýyna tıe bastady.
— «Sáýlet» yqsham aýdanynda sońǵy onshaqty kún shamasynda jaryqty birneshe saǵatqa óshirip tastaıdy. Aldyn ala eskertý de jasamaıdy. Shilińgir shildede turǵyndarǵa qasaqana osylaı jasalyp otyr ma? Muny qalaı túsinemiz? Mı qaınatar ystyqta úlkender men balalardyń jaǵdaıyn jaýapty organdar nege oılamaıdy? Kún ot bop tur. Taltúste jaryq joq, — delingen sondaı shaǵymdardyń birinde.
Qyzylorda elektr taratý toraptary kompanııasy munyń sebebin jekelegen aýmaqtarda jóndeý jumysynyń jurgizilýinen dep túsindirdi.
— Aýa raıynyń shamadan tys ystyq bolýyna jáne elektr energııasyn tutyný kóleminiń artýyna baılanysty elektr jelileriniń senimdi ári turaqty jumysyn qamtamasyz etý maqsatynda jekelegen ýchaskelerde ýaqytsha aǵytý-qosý jumysy júrgizilip jatyr. Osyǵan baılanysty keıbir aýmaqtarda elektr energııasyn berý ýaqytsha shektelýi múmkin. Keltirilgen ýaqytsha qolaısyzdyqtar úshin keshirim suraımyz, — dep habarlady kompanııanyń baspasóz qyzmeti.
Eske salaıyq, 28 maýsym kúni qatty jeldiń saldarynan Qyzylorda qalasynda turǵyn úıler men mekemelerdiń shatyry ushyp, ol elektr jelilerine tıip, symdar úzilip, elektr baǵanalary búlingen bolatyn.
