Kún men jel energııasyna arzan nesıe berile me
ASTANA. QazAqparat - Qazaqstannyń balamaly energetıka qaýymdastyǵynyń bas dırektory Arman Qashqynbaevtyń aıtýynsha, atalǵan uıym balamaly energetıkany damytamyn deıtin azamattarǵa arzan nesıe berý máselesin kótergen bolatyn. Osy oraıda arnaıy memlekettik baǵdarlamany da ázirleýdi usyndy, dep habarlaıdy QazAqparattilshisi.
Uıym basshysynyń aıtýynsha, Qazaqstanda kún men jel energııasy sııaqty balamaly qýat kózderin damytýǵa barlyq múmkindikter bar. «Terrıtorııamyz keń. Halyqtyń sany kóp emes. Sosyn adamdar bir-birinen shalǵaı turady. Dál sol shalǵaı jatqan aýyldarda kún men jel energetıkasyn damytqan tıimdi. «Ondaı aýyldar shalǵaıda ornalasqandyqtan ol jerde shaǵyn gıbrıdti qurylǵylardy ornatyp, energııa óndirgen tıimdi. Úndistan, Avstralııa jáne taǵy basqa memleketterde solaı isteıdi. Kún men jel energııasy arqyly shalǵaı aýyldardyń turǵyndary tońazytqysh, útik, uıaly telefon jáne taǵy basqa qurylǵylardy zarıadtaı alady. Sosyn sý sorǵyshtaryna qajetti energııany óndirip, baý-baqsha men egistik alqaptaryn sýarýǵa múmkindik bar», - dedi Qashqynbaev búgin Eýrazııalyq medıa forýmnyń paneldik sessııasynda.
Onyń sózine qaraǵanda, Qazaqstannyń balamaly energetıka qaýymdastyǵy arnaı memlekettik baǵdarlamany da ázirleýdi usynǵan bolatyn. «Biz Energetıka mınıstrligine baryp, EKSPO-dan keıin arnaıy memlekettik baǵdarlamany qabyldaýdy usyndyq. Qazir balamaly energetıkaǵa arnalǵan zań men tujyrymdama bar. Endi, bir memlekettik baǵdarlama bolýy qajet dep oılaımyz. Ondaı baǵdarlamalar aýyl sharýashylyǵy men qaıta óńdeý salasynda qabyldanǵan. Balamaly energetıka salasyna da teńgemen, mysaly, 5 paıyzdyq ústeme aqymen aqsha bólýge bolatyn edi. Sonda osy saladaǵy kompanııalar devalvatsııadan qoryqpaıdy. Óz bastamalaryn batyl iske asyrady. Biraq bizge ondaı aqsha ázirshe joq dedi», - dep atap kórsetti uıym basshysy.
