Kún ystyq, sý joq — BQO-da aýyl turǵyndary shaǵym jasady

ORAL. KAZINFORM — Batys Qazaqstan oblysy Terekti aýdany ortalyǵy Terekti aýylynda sýdyń joqtyǵy jóninde áleýmettik jelide aqparat jarııalandy.

Instagram áleýmettik jelisinde aýyl turǵynynyń málim etkenindeı, kún ystyq, Terektide sý joq. Turǵyn aýdan halqynyń sýsyz, al keıde jaryqsyz otyrǵanyna narazy.

Osyǵan baılanysty Terekti aýdany ákimdiginen jaýap berdi.

Ákimdik málimetine qaraǵanda, qazirgi tańda táýligine 800 tekshe metr sý beretin 6 uńǵyma táýlik boıy jumys istep tur. Áıtse de aýa temperatýrasynyń joǵarylaýyna baılanysty tutyný táýliktik qorǵa qaraǵanda 20 paıyzǵa ósti.

Sonyń saldarynan aýyldyń joǵarǵy jaǵyndaǵy turǵyndarǵa sýdyń qysymy ýaqytsha jetpeı jatyr. «Terekti — Taza sý» JShS tarapynan joǵary jaqtaǵy sýdyń qysymyn qalpyna keltirý boıynsha jumystar júrgizilip jatyr.

Aýdan ákimi Álııa Muhanbetjanovanyń aıtýynsha, temperatýra 30 gradýstan asqan jaǵdaıda 1 100 tekshe metr sý kerek. Al 25 gradýs bolǵanda, sý jetedi.

— Terekti aýylynda sý bar. Alaıda turǵyndar qazirgi ýaqytta aýyz sýdy baý-baqsha sýarýǵa, basqa maqsatqa paıdalanýda. Sol sebepti sý qysymy tómendep ketedi. Bıyl maýsym aıynda qarjy bólinip, «Jaıyqgıdrogeologııa» JShS mamandarynyń qatysýymen úsh uńǵyma tazalandy. Sý mol jetti. Biraq kún qatty ysyǵanda, sýdyń jetpeýi Terekti aýylynda otyz jyl boıy qaıtalanyp keledi, — dedi Kazinform tilshisine Álııa Bıǵazyqyzy.

Batys Qazaqstan oblysynda sońǵy aptada kún qatty ysyp ketti. 

BQO TJ departamentiniń baspasóz qyzmetinen málim etkenindeı, «Qazgıdromet» RMK málimetine sáıkes 13 shildede Batys Qazaqstan oblysynda keı jerlerde jeldiń ekpini sekýndyna 15-20 metrge deıin jetedi. Kúndiz 35 gradýs qatty ystyq. Oblystyń batysy men ońtústiginde 40 gradýsqa jetýi yqtımal.

Osyǵan baılanysty BQO TJ departamenti eskertý jarııalady.

Óńirde joǵary órt qaýpi saqtalyp otyr. 

Eske sala keteıik, budan buryn Oralda qubyr aýystyrýǵa baılanysty 200-den astam abonent ystyq sýsyz qalǵanyn jazǵan edik.