Kún energııasymen ushatyn ushaqpen jer sharyn aınalyp ótpek
ASTANA. QazAqparat - Belgili shveıtsarııalyq zertteýshi Bertran Pıkar men onyń seriktesi Andre Borshberg dúısenbi kúni kún energııasynan qýat alyp ushatyn ushaqpen jer sharyn aınalyp ótpekke bel býdy.
"Solar Impýls-2" ataýyn alǵan bir oryndyq ushaq Ábý-Dabıden shyǵyp, aldymen Omanǵa, keıin Úndistanǵa ushýy tıis.
Aldaǵy birneshe aıda ushaq Antarktıdadan basqa barlyq kontınentke ushyp, Tynyq jáne Atlantıkalyq muhıttardy kesip ótedi.
Pıkar men Borshberg ushaqty kezekpen basqarady. Táýekelge bel býǵandar ushaqtyń kem-ketigin jóndeý úshin birneshe qalalarda toqtaıtyn bolady. Sondaı-aq olar qoǵam aldynda balamaly energetıka týraly dáris oqýdy josparlap otyr.
