Kúni boıy otyryp jumys isteý omyrtqaǵa zııan, maman qandaı keńes beredi

Kúni boıy keńsede otyryp jumys isteýdiń óz zııany bar, bul eń aldymen omyrtqaǵa úlken júk túsiredi. Alaıda keńsede uzaq ýaqyt otyrýdyń saldaryn joıýǵa bolady. QR Prezıdenti Іs Basqarmasy Medıtsınalyq ortalyǵy basshysynyń orynbasary Lıýdmıla Bıýrabekova ońtaıly ádistermen bólisti, dep habarlaıdy Kazinform. 

Sarapshynyń pikirinshe, keńsede kúnine 7-8 saǵat tapjylmastan otyrý bulshyqettiń bosańsýyna, qan tamyrlarynyń qysylýyna ákelýi múmkin. Sonymen qatar omyrtqa ózgerip, ol bas aýrýy men býyn aýrýlaryna, tynys alýdyń qıyndaýyna alyp keletin jaǵdaılar bar.

«Ǵylymı zertteýler barysynda kúnine 30-40 mınýt belsendi bolý, jattyǵý jasap, bir mezgil júrý otyryp isteıtin jumystyń zııanyn edáýir tómendetetini anyqtaldy. Ǵalymdardyń taldaýyna súıensek, fızıkalyq belsendiligi tómen adamdar arasynda mezgilsiz ólim kóbeıgen. Al kúnine kem degende jarty saǵatqa qımyl-qozǵalys jasaý kúni boıy otyrýǵa baılanysty bolýy múmkin aýrýlardyń qaýpin aıtarlyqtaı tómendetedi», — dep jazdy Lıýdmıla Bıýrabekova óziniń Facebook-tegi paraqshasynda.

Sarapshy kúndelikti ómirde ońaı qoldanýǵa bolatyn qarapaıym áreketterge mysal keltirdi:

Tańerteńgilik jattyǵýlar: kún saıyn 15 mınýttyq jattyǵý denege qýat berip, kóńil kúıdi jaqsartýǵa, qan qysymyn qalypqa keltirýge jáne metabolızmdi jyldamdatýǵa kómektesedi.

Jaıaý serýendeý: kólikti jumys ornynan alystaý qoıý, kúndiz birneshe ret az ýaqytqa serýendeý sharshaýdy, mazasyzdyqty, kúızelisti azaıtýǵa jáne tábetti basýǵa kómektesedi.

Jumystaǵy belsendilik: oryndyqtan turyńyz, lıfttiń ornyna baspaldaqty paıdalanyńyz, elektrondy poshtanyń ornyna áriptesterińizben betpe-bet sóılesińiz.

Itpen serýendeý: úı janýarlaryn serýendetý sizge qajetti belsendilik deńgeıin saqtaýǵa kómektesetin tamasha jattyǵý bolmaq.

Kúlimsireý: bet bulshyqetterin únemi jattyqtyrý jaǵymdy emotsııalar berip qana qoımaı, sonymen qatar stresti azaıtady, kásibı jetistikterge jeteleıdi.