Kún batareıasymen ushatyn Solar Impulse 2 ushaǵy Kalıfornııaǵa qondy
ASTANA. QazAqparat - Kún sáýlesinen qýat jınap ushatyn Solar Impulse 2 áýe kóligi Tynyq muhıtynyń ústimen úsh kún ushyp, San-Frantsısko qalasyna baryp qondy, dep habarlady www.24.kz.
Gavaıı araldarynan AQSh-qa jetý úshin ushaq shamamen 4 myń shaqyrymdy baǵyndyrǵan. Ol Jer sharyn tolyqtaı bir aınalyp shyǵý úshin ótken jyldyń naýryz aıynda Birikken Arab Ámirlikterinen kókke kóterilgen. Alaıda Japonııadan Gavaııge keler jolda ushaqtan aqaý shyǵyp, 8 aı jóndeýge turdy. Onyń qanattarynda 17 myńǵa jýyq kúnnen kýat alatyn batareıalar qondyrylǵan. Sonyń kómegimen olar qozǵaltqyshty aınaldyryp qana qoımaı, onyń túni boıy toqtamaı ushýyna qýat jınaıdy. Innovatsııalyq ushaqty Bertran Pıkar men Andre Borshberg esimdi ushqyshtar basqarady.
