«Kúmis jas» jobasyna qatysýshylardyń basym bóligi aýyl turǵyndary

QR Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, jumyspen qamtylǵandardyń basym bóligi Túrkistan oblysynda – 1 678 adam, Qaraǵandy oblysynda – 1 093, Aqtóbe oblysynda – 807 jáne Jambyl oblysynda – 705 adam.

Jobaǵa qatysýshylar qatarynda áıelder men aýyl turǵyndary kóp. Qatysýshylardyń 54,7%-y, ıaǵnı 5 658-i – áıelder. Al aýyl turǵyndarynyń úlesi 61%-dy nemese 6 324 adamdy quraıdy.

Aýyl sharýashylyǵy (41%), qyzmet kórsetý (23%) jáne bilim berý (7%) salalary negizgi baǵyttar qatarynda. Eń suranysqa ıe mamandyqtar mal baǵýshy, sanıtar, kassır, satýshy, kúzetshi, aspaz, tiginshi, admınıstrator, júrgizýshi jáne býhgalter bar.

Bilimine kelsek, qatysýshylardyń 78%-y orta bilimdi, 18%-y orta tehnıkalyq bilimdi, al 4%-y joǵary bilimdi.

Aıta keteıik, «Kúmis jas» jobasy 2022 jyldan beri júzege asyrylyp keledi. Onyń negizgi maqsaty jasy úlken azamattarǵa jumys tabýǵa járdemdesý jáne olardyń turaqty jumysqa ornalasýyna jaǵdaı jasaý.

Jobaǵa mansap ortalyǵynda jumyssyz retinde tirkelgen 50 jastan asqan azamattar qatysa alady. Ol úshin turǵylyqty jeri boıynsha mansap ortalyǵyna júginý qajet.

Atalǵan jobaǵa qatysý merzimi 36 aıǵa deıin sozylady. Osy ýaqyt ishinde memleket qyzmetkerdiń jalaqysynyń bir bóligin sýbsıdııalaıdy. Bul jumys berýshilerge tájirıbeli mamandardy jumysqa tartýǵa jáne olardyń turaqty jumys ornynda qalýyna múmkindik beredi.

Memlekettik sýbsıdııa mólsheri:

1-12 aı aralyǵynda – belgilengen jalaqynyń 70%-y, biraq 30 AEK-ten aspaıdy;

13-24 aı aralyǵynda – 65%-y, biraq 30 AEK-ten aspaıdy;

25-36 aı aralyǵynda – 60%-y, biraq 30 AEK-ten aspaıdy.

Basty sharttarynyń biri qatysýshylardy keıin de turaqty jumyspen qamtý. Sýbsıdııa tóleý merzimi aıaqtalǵannan keıin jumys berýshi olarmen eńbek qatynasyn jalǵastyrýǵa mindetti. Zeınet jasyna jetpegen qyzmetkerdi keminde bir jyl turaqty jumyspen qamtýy kerek. Al zeınetaldy jastaǵy, 58 jastan asqan qatysýshyny zeınetke shyqqanǵa deıin jumyspen qamtamasyz etýge tıis.

Jobanyń tıimdiligin Ulytaý oblysynyń turǵyny Tolǵanaı Abdrahmanovanyń oqıǵasynan da kórýge bolady.

2023 jyldyń naýryzynda ol jumys izdep, Jańaarqa aýdanynyń mansap ortalyǵyna júgingen. Mamandar oǵan «Kúmis jas» jobasy aıasynda «Zolotaıa» jeke kásipkerligine tiginshi bolyp ornalasýdy usynǵan.

Tolǵanaı Bekmyrzaevna úsh jyl boıy óz mindetterin adal atqaryp, tájirıbe jınaqtaǵan. Jumys barysynda ózin jaýapty ári tııanaqty qyzmetker retinde kórsetken.

Kásibı sheberligi men jumysyna degen jaýapkershiliginiń arqasynda ol jumys berýshiniń senimine ıe boldy. Jobaǵa qatysý merzimi aıaqtalǵannan keıin oǵan sol uıymda turaqty jumys isteý usynyldy.

Tolǵanaı Abdrahmanovanyń oqıǵasy jumysqa ornalasýǵa beriletin ýaqytsha qoldaýdyń turaqty jumyspen qamtylýǵa jáne kásibı jolyn jalǵastyrýǵa múmkindik beretinin kórsetedi.

«Kúmis jas» jobasy aǵa býyn ókilderine eńbek belsendiligin saqtaýǵa, jınaǵan tájirıbesin paıdalanýǵa, jańa daǵdylardy meńgerýge jáne eńbek naryǵynda suranysqa ıe bolýǵa kómektesedi.

«Kúmis jas»: 50 jastan asqan 9,2 myń azamat jumyspen qamtyldy.