«Kúmis jas» jobasy boıynsha 12,4 myń adam jumysqa ornalastyryldy
ASTANA. KAZINFORM – 2025 jylǵy 1 shildedegi jaǵdaı boıynsha «Kúmis jas» jobasy boıynsha 12,4 myń adam jumysqa ornalastyryldy. 2025 jyly osy baǵyt boıynsha barlyǵy 23,8 myń adamdy jumysqa ornalastyrý josparlanyp otyr.
«Kúmis jas» jobasy boıynsha jumysqa ornalasqandardyń eń kóp sany kelesi oblystarda baıqalady: Almaty — 1 118 adam, Jambyl — 1 032 adam, Aqtóbe — 1 007 adam, Qaraǵandy — 1 004 adam jáne Jetisý oblysynda — 1 040 adam.
Qatysýshylardyń basym bóligi aýyl sharýashylyǵy salasynda — 36%, qyzmet kórsetýde — 23%, qoǵamdyq tamaqtandyrýda — 21% jumyspen qamtylǵan.
Bul jobaǵa 50 jastan asqan jumyssyz azamattar zeınetkerlik jasqa tolǵanǵa deıin qatysa alady. Jobaǵa qatysý úshin mansap ortalyǵyna ótinish berý qajet.
«Kúmis jas» jobasyna qatysý merzimi aıaqtalǵannan keıin jumys berýshi zeınetkerlik jasqa tolmaǵan adamdy keminde 1 jyl merzimge turaqty jumys ornyna, sondaı-aq zeınetaldy jastaǵy adamdy zeınetkerlikke shyqqanǵa deıin jumysqa ornalastyrýǵa mindetti.
Jobaǵa qatysý uzaqtyǵy 36 aıdan (3 jyl) aspaıdy jáne osy ýaqyt aralyǵynda qatysýshylardyń jalaqysy memleket tarapynan sýbsıdııalanady.
«Kúmis jas» jobasyn qarjylandyrýdy eńbek mobıldiligi ortalyǵy jumys berýshiniń joba aıasynda jumysqa ornalastyrylǵan jumyssyzdarǵa eńbekaqy tóleýge jumsaǵan shyǵyndarynyń bir bóligin óteýge sýbsıdııalar berý jolymen júzege asyrady. Sýbsıdııalar mólsheri: jumystyń birinshi jylynda jalaqy mólsheriniń 70%-yn (biraq 30 AEK-ten aspaıtyn), jumystyń ekinshi jylynda jalaqy mólsheriniń 65%-yn (biraq 30 AEK-ten aspaıtyn), jumystyń úshinshi jylynda jalaqy mólsheriniń 60%-y (biraq 30 AEK-ten aspaıtyn).
Kóptegen qazaqstandyq joba týraly oń pikir bildirip jatyr.
Solardyń biri — Aqtóbe oblysynyń turǵyny Alevtına Pelehan «Kúmis jas» jobasy boıynsha jańa jumysta zeınetkerlik jasqa deıin eki jyl jumys istep, laıyqty demalysqa shyqty.
— 2023 jyly jumys izdep, mansap ortalyǵyna habarlastym, onda maǵan «Kúmis jas» jobasyna qatysýdy usyndy. Joldama boıynsha «Qurylys-Muǵabııa» JShS-ne qujat mamany bolyp jumysqa ornalastym. Al aqpan aıynda zeınetkerlik jasqa tolyp, zeınetke shyqtym, — dep ótkenimen bólisti ol.
Aqtóbe oblysynda 2025 jyly «Kúmis jas» jobasy boıynsha 1 205 adamdy jumysqa ornalastyrý josparda bar.
Aıta ketelik «Kúmis jas» jobasy aıasynda 15 myńnan astam adam jumysqa ornalasqan.