«Kúmis jas»: 50 jastan asqan 9,2 myń azamat jumyspen qamtyldy
ASTANA. KAZINFORM — Elde 50 jastan asqan azamattardy jumyspen qamtýǵa arnalǵan «Kúmis jas» jobasy jalǵasyp jatyr. Jyl basynan beri jobaǵa 9,2 myńnan asa adam qatysqan. Bul bıylǵy jospardyń 92%-dan astamy oryndalǵanyn kórsetedi.
Eńbek jáne halyqty áleýmettik qorǵaý mınıstrliginiń baspasóz qyzmetiniń málimetinshe, joba arqyly jumysqa ornalasqandar sany boıynsha Túrkistan, Qaraǵandy, Aqtóbe jáne Jambyl oblystary aldyńǵy qatarda. Qatysýshylardyń 54,4 paıyzy — áıelder, al 63,2 paıyzy — aýyl turǵyndary.
— «Kúmis jas» 50 jastan asqan, jumys izdep júrgen jáne Mansap ortalyǵynda jumyssyz retinde tirkelgen azamattarǵa arnalǵan. Oǵan qatysý merzimi 36 aıǵa deıin sozylady. Qoldaý tetigi aıasynda memleket jumys berýshige qyzmetkerdiń jalaqysynyń bir bóligin óteýge kómektesedi. Aı saıynǵy sýbsıdııa mólsheri 30 AEK-ten aspaıdy, — delingen mınıstrlik habarlamasynda.
Sýbsıdııa kólemi úsh jyl ishinde birtindep ózgeredi:
birinshi jyly — jalaqynyń 70 paıyzy;
ekinshi jyly — 65 paıyzy;
úshinshi jyly — 60 paıyzy.
Bul rette jobanyń mańyzdy talaptarynyń biri — jumys berýshi baǵdarlama aıaqtalǵannan keıin qyzmetkerdi turaqty jumys ornymen qamtamasyz etýi tıis.
Zeınetaldy jastaǵy qatysýshylarǵa joba aıaqtalǵan soń keminde bir jyl turaqty jumys isteýge múmkindik beriledi. Al 58 jastan asqan azamattar zeınet jasyna jetkenge deıin jumysyn jalǵastyra alady.
Bul bastamanyń tıimdiligin óńirlerdegi naqty mysaldardan kórýge bolady. Abaı oblysynyń turǵyny Qarlyǵash Abylǵazına «Kúmis jas» baǵdarlamasyna úsh jyl qatysyp, kásibı bilimi men tájirıbesin kórsetti. Búginde ol «Tynyshbaev» jeke kásipkerliginde aspaz bolyp turaqty jumys isteıdi.
— Joba arqyly men jumys taýyp, turaqty tabysqa qol jetkizdim. Ózimdi áli de qajet ári suranysqa ıe maman retinde sezindim. Elý jastan asqannan keıin jaqsy jumys tabý ońaı emes. Sondyqtan «Kúmis jas» men úshin úlken qoldaý boldy. Úsh jyl ishinde óz múmkindigimdi kórsetip, qazir turaqty jumys istep júrgenime qýanyshtymyn. Óz qatarlastaryma aıtarym jańa múmkindikterdi paıdalanýdan qoryqpańyzdar. Bul jasta da ómir jalǵasady, kásibı damýǵa da múmkindik bar, — dedi Qarlyǵash Abylǵazına.
Qatysýshylardyń jetistigi jas ulǵaıǵan saıyn kásibı múmkindikterdiń azaımaıtynyn ańǵartady. Kóp jylǵy tájirıbe men qalyptasqan daǵdy jumys berýshiler úshin qundy mamandardy tańdaýǵa jol ashady. Atalǵan joba úsh tarapqa da tıimdi. Qatysýshylar turaqty tabys taýyp, kásibı qyzmetin jalǵastyrýǵa múmkindik alady. Jumys berýshiler tájirıbeli mamandardy jumysqa tartady. Al memleket eńbekke qabiletti azamattardyń turaqty jumyspen qamtylýyna jaǵdaı jasaıdy.
Buǵan deıin jumyssyz azamattarǵa 6 aıǵa deıin tegin kásiptik oqý usynylatynyn jazdyq.
