«Kúmis ýnıversıtet»: Aqtóbede 50 jastan asqan azamattarǵa arnalǵan oqý maýsymy bastaldy
AQTÓBE. KAZINFORM – Q.Jubanov atyndaǵy Aqtóbe óńirlik ýnıversıtetinde «Kúmis ýnıversıtet» jobasynyń kezekti oqý maýsymy bastaldy.
Ǵylym jáne joǵary bilim mınıstrligi málimetinshe, joba 50 jastan asqan azamattarǵa arnalǵan jáne ómir boıy bilim alý prıntsıpin júzege asyrýǵa baǵyttalǵan.
2026 jyly «Kúmis ýnıversıtet» jobasyna 50 jastan asqan 120 tyńdaýshy tirkeldi. Qatysýshylardyń ortasha jasy – 66 jas, al joba aıasyndaǵy eń eresek tyńdaýshy 79 jasta. Bul kórsetkishter jobanyń qoǵam tarapynan joǵary suranysqa ıe ekenin jáne egde jastaǵy azamattardyń bilim alýǵa degen qyzyǵýshylyǵynyń artyp kele jatqanyn aıqyndaıdy.
2021 jyly «Ómir boıy oqý» tujyrymdamasy aıasynda iske qosylǵan «Kúmis ýnıversıtet» – áleýmettik mańyzy joǵary ári tabysty júzege asyrylyp kele jatqan biregeı joba. Jobanyń negizgi maqsaty – aǵa býyn ókilderine zamanaýı bilim men daǵdylardy meńgerýge múmkindik berý, olardyń jeke damýyn qoldaý jáne qoǵam ómirine belsendi aralasýyna jaǵdaı jasaý.
2026 jylǵy oqý maýsymynda tyńdaýshylar úshin qazaq tili, aǵylshyn tili, tsıfrlyq saýattylyq, qarjylyq saýattylyq, quqyqtyq saýattylyq, toǵyzqumalaq, tigin, resýrstyq qoldaý jáne úılesimdilik, shyǵys bıi sııaqty 9 baǵyt boıynsha kýrstar uıymdastyrylady.
Oqý protsesi 3 aıǵa jýyq kólemde ótkizilip, teorııalyq jáne praktıkalyq sabaqtardy, sheberlik synyptaryn, trenıngter men ınteraktıvti is-sharalardy qamtıdy. Kýrstardy Jubanov ýnıversıtetiniń tájirıbeli professor-oqytýshylar quramy júrgizedi.
Kýrs sońynda barlyq tyńdaýshyǵa arnaıy sertıfıkat tabystalady.
2021 jyldan beri Jubanov ýnıversıteti bazasynda 350-den astam eresek azamat til, tsıfrlyq saýattylyq, sport jáne shyǵarmashylyq baǵyttar boıynsha bilim alyp, óz biliktiligin arttyrdy.
Aıta keteıik, byltyr 1700-den astam medıtsına qyzmetkeri biliktilikti arttyrý kýrstarynan ótken.