Kúmisten soǵylǵan «Baqyt» monetasy aınalymǵa shyǵady

ASTANA. QazAqparat - Ulttyq Bank 5 jeltoqsanda nomınaly 500 teńgelik «S. Aıtbaev «Baqyt» kollektsııalyq monetasyn aınalymǵa shyǵarady, dep habarlaıdy QazAqparat banktiń baspasóz qyzmetine silteme jasap.

«S. Aıtbaev «Baqyt» monetasy - ulttyq mádenıetimizdiń baılyǵyn tanytýǵa jáne Qazaqstannyń beıneleý ónerindegi baǵyttardyń tolyq aıasyn (grafıka, músin, beıneleý, mozaıka jáne t.b.) ashyp kórsetýge arnalǵan. Ol «Qazaqstannyń beıneleý óneri» monetalar serııasyna jatady.

Monetalardyń bet jaǵynda (aversinde) ortalyq bóliginde oıý-órnek aıasynda «QAZAQSTAN RESPÝBLIKASY • RESPÝBLIKA KAZAHSTAN» degen jazbanyń qorshaýynda Qazaqstan Respýblıkasynyń eltańbasy beınelengen. Monetanyń joǵary bóliginde Qazaqstan Respýblıkasy Ulttyq Bankiniń logotıpi ornalasqan. Logotıptiń sol jaǵynda «S. AITBAEV», oń jaǵynda «BAQYT» degen jazba bar. Monetanyń tómengi bóliginde nomınalyn bildiretin «500 TEŃGE» degen jazba ornalasqan. Monetalardyń syrt jaǵynda (reversinde) «Baqyt» kartınasynyń mınıatıýrasy beınelengen, onyń avtory - Qazaqstannyń sýretshisi jáne Qazaq KSR eńbegi sińgen qaıratker Salıhıtdın Aıtbaev.

Moneta sharshy pishindes - 37h37 mm.  925 synamaly kúmisten jasalǵan, massasy - 31,1  gramm, daıyndaý sapasy - «proof», taralymy - 1 500 dana.

Nomınaly 500 teńgelik kollektsııalyq monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý jáne aýdarym jasaý úshin qabyldanýǵa mindetti, barlyq bankterde shekteýsiz usaqtalady jáne aıyrbastalady.

Monetalar kollektsııalyq quny boıynsha satýǵa arnalǵan.

Kollektsııalyq monetalardy Ulttyq banktiń barlyq aýmaqtyq fılıaldarynda, sondaı-aq www.nationalbank.kz saıtynyń ınternet-dúkeni arqyly satyp alýǵa bolady.