«Kúmis Eńlikgúl»: Qazaqstandyq taýshańǵyshy Marııa Grıgoreva taǵy da júldeger atandy
ALMATY. QazAqparat- «Shymbulaq» taý-shańǵy kýrortynda taý shańǵysy sporty boıynsha erler men áıelder arasynda ótip jatqan «Kúmis Eńlikgúl» halyqaralyq týrnıri aıasynda qyzdar arasynda alyp slalomnan jarys aıaqtaldy.
Bul joly da jeńis tuǵyryna Ýkraına men Qazaqstannyń taýshańǵyshylary kóterildi. Bogdana Matsotska alǵashqy múmkindikpen-aq (1:15.86) jarystyń kósh basyna shyqty. Al ekinshi talpynysta máre syzyǵyna 1:17.82 mınýtta jetti. Sóıtip, 2:33.68 mınýttyq qorytyndy ýaqytpen jarys jeńimpazy atandy. Ekinshi orynǵa onyń otandasy Tatıana Tıkýn kóterildi (2:35.77). Al qazaqstandyq taýshańǵyshy Marııa Grıgoreva úshinshi oryndy ıelendi (2:39.04).
Otandastarymyz Ekaterına Karpova men Ekaterına Cherepanova tórtinshi jáne besinshi oryndardy mise tutty.
Búgin týrnırdiń aıaqtalar kúni alyp slalomnan erler arasynda jarys ótedi.
