«KÚMІS EŃLІKGÚL»: Qazaqstandyq T. Pımenov pen I. Zakýrdaev sýperalyp slalom men sýper-kombınatsııadan jeńimpaz atandy
ALMATY. QazAqparat- «Shymbulaq» taý-shańǵy kýrortynda taý shańǵysy sporty boıynsha erler men áıelder arasynda ótip jatqan «Kúmis Eńlikgúl» halyqaralyq týrnıri aıasynda sýperalyp slalom men sýper-kombınatsııadan jarystar ótti.
Erler arasynda ótken básekede jeńis tuǵyryna túgelimen qazaqstandyq sportshylar jaıǵasty. Birinshi oryndy Taras Pımenov jeńip alsa (1:24.69), ekinshi bolyp máre syzyǵynan Igor Zakýrdaev ótti (1:27.98). Al qola medal Nıkıta Kalıýjnyıdyń qanjyǵasyna baılandy (1:25.69).
«Búgin qazaqstandyq jáne ýkraındyq sportshylar úshin ótte sátti kún boldy. Bizdiń komanda úılesimdi áreket jasap, úzdik nátıje kórsetti. Al búgingi jarys joly men úshin minsiz kúıinde boldy» - dedi Taras Pımenov.
Áıelder arasynda sýpergıganttan ýkraınalyq sportshy Bogdana Matsotska qazaqstandyq Marııa Grıgorevany 0.91 sekýndtqa basyp ozyp, birinshi oryndy ıelendi (1m:27.31). Úshinshi orynǵa taǵy bir ýkraındyq taýshańǵyshy Olga Knysh jaıǵasty (1.29.45).
«Uıymdastyrýshylar aýa raıynyń qolaısyzdyǵyna qaramastan jarysty joǵary deńgeıinde uıymdastyra bildi. Al jarys joly men úshin ájepteýir kúrdeli boldy. Sodan da bolar laıyqty nátıje kórsete almadym. Biraq sporttyń aty sport qoı. Ol tek jeńisten ǵana turmaıdy. Jeńile de bilý kerek» - dedi Marııa Grıgoreva.
Budan ári jarys sýper-kombınatsııaǵa ulasty.
Erler arasynda birinshi oryndy qazaqstandyq Igor Zakýrdaev jeńip aldy (2:08.55). Al frantsııalyq taýshańǵyshy Emılen Delor jeńimpazdan 1.14 sekýndqa artta qalyp, ekinshi oryndy ıelendi. Úshinshi orynǵa taǵy bir qazaqstandyq sportshy Taras Pımenov jaıǵasty. Onyń kórsetkishi 2:11s.
Áıelder arasynda birinshi oryndy taǵy da Bogdana Matsotska jeńip aldy ((2:13.56). Ýkraına quramasynyń ókili bul joly eki qazaqstandyq sportshyny Ekaterına Karpova (+1.68) men Ekaterına Cherepanovany (+16.11) basyp ozdy.
Búgin taý shańǵy sportynyń ardagerleri men áýesqoılary arasynda jarys ótedi
