Kúmbirlegen kúı keshi kórermenderdi bir serpiltip tastady
ASTANA. 2 sáýir. QazAqparat - Astanadaǵy Prezıdenttik mádenıet ortalyǵynyń kontsert zalynda halyqaralyq jáne respýblıkalyq baıqaýlardyń laýreaty, Prezıdent stıpendııasynyń ıegeri Núrken Áshirovtyń «Álqıssa» atty kúı keshi ótti.
Jas daryn el táýelsizdiginiń 20 jyldyǵy qarsańynda Elorda jurtshylyǵyna esep berdi.
Aıta ketý kerek, Núrken Áshirov 2001 jyly Qazaqstan táýelsizdiginiń 10 jyldyq mereıtoıyna arnalǵan merekelik kontsertte ataqty dombyrashylar Ázıdolla Esqalıev, Qarshyǵa Ahmedııarov, Aıgúl Úlkenbaeva, Rústem Kúlshebaevtarmen qatar óner kórsetip, halyqtyń da, ulttyq ónerdi súıgen Elbasynyń da ystyq yqylasyna bólengeni belgili. 2004 jyly ataqty Nurǵısa Tilendıev óz qolymen qurǵan «Otyrar sazy» orkestrine qabyldanyp, tanymal ujymnyń sheber dombyrashysyna aınaldy.
Ol 2006 jyly kúı atasy Qurmanǵazy atyndaǵy respýblıkalyq dombyrashylar baıqaýynda birinshi oryndy, 2009 jyly kúıshi-kompozıtor Nurǵısa Tilendıev atyndaǵy baıqaýdyń bas júldesin jeńip alǵan daryn ıesi.
2010 jyly Qazaqstannyń Eýropadaǵy qaýipsizdik jáne yntymaqtastyq uıymyna tóraǵalyǵy kezeńinde barlyq resmı is-sharalar aıasynda ótken kontsertterde qazaq ónerin búkil álemge pash etti.
Núrken Nurǵalıuly osy keshte Qazaqstannyń ár óńiriniń kúılerin mánerine keltirip tartyp berdi. Qurmanǵazydan bastap tanymal kúıshilerdiń týyndylary oryndaldy. Nurǵısa Tilendıev pen Qarshyǵa Ahmedııarovtyń kúılerin de oryndap, halyqty óziniń ónerine tánti etti. Keıbir kúılerdi «Tartý» dombyrashylar úshtigimen birge jáne «Tilep» qobyzshylar kvartetimen qosylyp oryndady. Sondaı-aq Aıtqalı Jaıymovtyń mýzykalyq shyǵarmasyn, Murat Sydyqovtyń «Murattyń tókpesi» kúıin kórermen nazaryna usyndy. Núrkenniń inisi Tólebı Áshirov sahnaǵa shyǵyp, Ábdimomyn Jeldibaevtyń «Erke sylqym» kúıin shertti.
Dombyrany sheber tarta biletin Núrkenniń ózi shyǵarǵan kúıleri de bar. Osy keshte Nurǵısa Tilendıevke arnaǵan «Jyrqıssa» kúıin jurtshylyqqa tyńdatty. Elordalyq kórermender jyly qabyldap, qoshemet kórsetti. Myrzataı Joldasbekovtiń «Tolǵaý» kúıin de oryndap berdi.
Bul keshke qoǵam jáne memleket qaıratkerleri, Parlament depýtattary qatysty. Núrkendi kúı ónerine baýlyǵan ustazy Aıtjan Toqtaǵan da osy shyǵarmashylyq keshtiń qurmetti qonaǵy boldy.
Qasıetti kúı ónerin dáripteýge arnalǵan bul sharany qoǵam qaıratkeri, fılologııa ǵylymdarynyń doktory, professor Myrzataı Joldasbekov basshylyq jasaıtyn Prezıdenttik mádenıet ortalyǵy uıymdastyrdy.
Kesh sońynda Senat depýtaty Ómirbek Baıgeldı jas daryn ıesine shyǵarmashylyq tabys tilep, bata berdi.
