Qumaı tazyǵa qurmet: Qazaqstanda jańa ulttyq kún paıda boldy
ASTANA. KAZINFORM — Búgin elimizde Qazaq tazysy men tóbeti kúni alǵash ret atalyp ótip jatyr. Bul týraly Prezıdenttiń keńesshisi — Baspasóz hatshysy Aıbek Smadııarov málim etti.
— Qumaı tazy — jeti qazynamyzdyń biri, boıynda adaldyq, eptilik pen tektilik qasıetteri ushtasqan tól mádenıetimizdiń asyl murasy. Ǵasyrlar boıy Uly dala tósinde kóshpendiler turmysymen bite qaınasqan tazy men tóbet bizdi tarıhymyzben jáne týǵan jer men ósken ortasyn qadir tutqan ata-baba dástúrimen baılanystyrady. Memleket basshysy Qasym-Jomart Toqaev tazy tuqymyn saqtap, kóbeıtýge jáne ony halyqaralyq deńgeıde nasıhattaýǵa aıryqsha mán beredi, — delingen habarlamada.
Baspasóz hatshysysynyń pikirinshe, Prezıdent tapsyrmasymen sońǵy jyldary bul baǵytta júıeli jumys atqaryldy. Qazaqy ıt tuqymdaryn saqtaý jáne ósimin molaıtý týraly zań qoldanysqa endi. Elimiz Halyqaralyq kınologııa federatsııasynyń músheligine qabyldandy.
— 2024 jyly qazaq tazysy halyqaralyq deńgeıde aldyn ala moıyndaldy. Qazaqstan osy tuqymnyń shyqqan jeri retinde resmı túrde bekitildi. Búginde qumaı tazylarymyz álemdik iri kórmelerde júldeli oryndar alyp júr. Asyl tuqymdy ıtti kóbeıtý qarqyn alyp, tazy asyraýshylar qatary artyp keledi. Qazaqy ıt tuqymdary ulttyq ortalyǵynyń qurylysy aıaqtalýǵa jaqyn. Tarıhı muramyz ben ulttyq salt-dástúrimizdi qurmetteý, tabıǵatty aıalaý — Ata zańymyzda qundylyqtar retinde aıqyndalǵan. Qazaq tazysy men tóbeti kúnin atap ótý — biregeı muramyzdy álemge dáripteýge septigin tıgizetin mańyzdy qadam, — dep atapt ótti ol.
Ǵasyrlardan jetken tuqymnyń tól bolmysyn saqtap, damytý baǵytynda qandaı jumystar atqarylyp jatqanyn Kazinform tilshisiniń taldaý maqalasynan oqyńyz.
