«Qumaı arheologııalyq-etnografııalyq kesheni: zertteý jáne saqtaý» atty dala semınary ótedi
ASTANA. 16 tamyz. QazAqparat - 19 tamyzda Qumaı ózeniniń alqabyndaǵy «Buırataý» ulttyq parkiniń landshaftynda eskertkishterdi zertteý jáne saqtaý maqsatyndaǵy dalalyq semınar ótedi.
Qumaı arheologııalyq-etnografııalyq keshenindegi eskertkishterdi zertteý 2009 jyly bastalyp, 2010-2011 jylǵa deıin jalǵasty. Mádenı mura damýynyń ártúrli kezeńderine jatatyn qaıtalanbas jerleý jáne ǵuryptyq qurylystardyń serııalyq úlgileri bir keńistikte ornalasqan.
Qola dáýiriniń qurylysy júzdegen jerleý nyshandarymen kórinis beredi. Atap aıtqanda, keıingi temir dáýiriniń qorǵandarymen birge ornalasqan tas jáshikteri bar qorshaý men túrk jáne ortaǵasyrlyq dáýirdegi jerleý konstrýktsııalary ornalasqan atalmysh aýmaqtan saq dáýiriniń damýy kezeńine jatatyn músin tabylǵan. Túrk dáýirine jatatyn kýlttik eskertkishter ǵuryptyq qorshaýlarmen kómkerilgen. Qurylystyń shyǵys jaǵyna ornalasqan barlyǵy 9 tas músini bar 11 ǵuryptyq qorshaý túgelimen kartaǵa túsirilgen.
Túrk dáýiriniń eskertkishi Qosbatyr, Qaraǵaıly 1 jáne Qaraǵaıly 2, XI-XIII ǵ. qola dáýirinen jetken qorshaý men qorǵanǵa arheologııalyq qazba jumystary júrgizildi. Barlyq eskertkishter rásimdelgen, qujaty bar jáne kúzetke alynǵan. Qazba jumysy barysynda zerttelgen eskertkishter Qumaı ózeniniń keńistikti alqabynda qaıta qalpyna keltirilip jóndelgen.
Sharanyń ótetin orny - Aqmola oblysy, Ereımentaý aýdany, Qaraǵaıly aýylynyń ońtústik-shyǵysyna qaraı 3 shaqyrym qashyqtyqta ornalasqan Qumaı ózeniniń alqabyndaǵy, Jylandy taýynyń etegindegi «Buırataý» memlekettik ulttyq parki.
Sharany QR Prezıdenttik mádenıet ortalyǵy, L.N.Gýmılev atyndaǵy EUÝ, «Buırataý» memlekettik ulttyq tabıǵı parki, Ereımentaý aýdanynyń ákimdigi uıymdastyryp otyr.
