Qumar oıynǵa qumartqandar kóbeıip barady
NUR-SULTAN. QazAqparat – Ótken jyly elimizde qumar oıyndar men bás uıymdastyratyn kompanııalar men býkmekerlerdiń qyzmeti rekordtyq somaǵa jetti, dep habarlaıdy QazAqparat tilshisi.
Finprom.kz portalynyń málimetinshe, 2020 jyly qumar oıyndar men bás tigýdi uıymdastyrý qyzmetteriniń kólemi 78,6 mlrd teńgege jetken. Bul kórsetkish 2019 jylmen salystyrǵanda 6 esege kóp. Salystyrý úshin aıtar bolsaq, 2019 jyly atalǵan sektordaǵy qyzmet kólemi 13,3 mlrd teńge bolatyn. Al 2020 jyldyń 4-toqsanynda ǵana qumar oıyndar men bás tigýdi uıymdary qyzmetiniń kólemi kúrt ósip, ne bári 4 aıdyń ishinde 59,3 mlrd teńgege jetti.
Aıta keterligi, 2019 jyly qumar oıyndar men bás tigý qyzmeti kóleminiń 86 paıyzy oıyn alańdary ornalasqan Almaty men Aqmola oblystaryna tıesi edi. Biraq, 2020 jyly jaǵdaı kúrt ózgerip, bul óńirlerge qyzmet kóleminiń ne bári 19,8 paıyzy ǵana tıesili boldy.
Ótken jyly kósh basyna 58,2 mlrd teńgemen Almaty qalasy shyqty. Ońtústik astanada 2019 jylmen salystyrǵanda saladaǵy qyzmet kólemi birden 80,4 esege artqan. Odan keıingi orynda Almaty oblysy (12,2 mlrd teńge) men elorda (4,5 mlrd teńge) tur. Qumar oıyndar men bás tigý qyzmeti kóleminiń aıtarlyqtaı ósimi Aqmola (3,4 mlrd teńge) jáne Jambyl (1,1 mlrd teńge) oblystarynda baıqaldy.
