Qumar oıynǵa áýes 11 áskerı qyzmetshi jumystan shyǵaryldy - mınıstrlik

ASTANA. QazAqparat – Ótken jyly ártúrli laýazymdaǵy 11 áskerı qyzmetshi jumystan qýyldy. Olar qumar oıyndarǵa áýes bolǵan. Bul týraly Qorǵanys vıtse-mınıstri Sultan Qamaletdınov málim etti, dep habarlaıdy QazAqparat tilshisi.

«Qumar oıyn – aýrý, ony emdeý kerek. Zańda ol úshin jaýapkershilik qarastyrylǵan. Biraq, bizde áskerı qyzmetkerlerdiń qumar oıynǵa áýestigin tekserý quqyǵy joq. Bizge derekterdi Bas prokýratýra, Іshki ister mınıstrligi beredi. Biz ony qarastyryp, áskerı qyzmetshi bolsa jumystan shyǵarylady», - dedi Sultan Qamaletdınov Májilis qabyrǵasynda BAQ ókilderiniń saýalyna jaýap bere turyp.

Mınıstr orynbasarynyń málimetinshe, qumar oıynǵa áýestengeni úshin jumystan qýylǵan áskerı qyzmetshilerdiń laýazymy ártúrli.

«Ótken jyldyń nátıjesi boıynsha 11 áskerı qyzmetshi jumystan shyǵaryldy. Bizde jumystan bosatý boıynsha jalpy áskerı jarǵy bar. Kez kelgen is sonyń aıasynda qaralady jáne onyń naqty merzimi bar. Mysaly, áskerı qyzmetshi qumar oıynmen ótken jyly áýestendi, biraq ol týraly bıyl ǵana anyqtalsa, onda biz qyzmetshini jumystan shyǵara almaımyz. Sebebi, is jarty jyl ishinde anyqtalyp, dáleldenýi tıis», - deıdi ol.