Qumar oıyndarynan keletin qaýip qandaı
ASTANA. QazAqparat - Astanada búgin elimizdegi qumar oıyn túrleriniń zańdylyǵy máselesine arnalǵan dóńgelek ústel ótti, dep habarlaıdy QazAqparat tilshisi.
Búgin Astanadaǵy «Nur Otan» partııasy ńımaratynda Qazaqstandaǵy qumar oıyndary máselesi men ony sheshý joldary taqyrybyna qatysty ashyq dıalog quryldy.
«Osy kezde oıyn bıznesi máseleleri boıynsha zańnamalyq aktilerge ózgertýler engizý kózdelip otyr. Osy turǵyda Parlament Májilisindegi partııa fraktsııasy arqyly zań jobasyn kúsheıtýge nıettimiz. Biz búgin joǵaryda aıtylǵan máseleni talqylaýǵa ártúrli sala mamandaryn shaqyrdyq. Shara nátıjesinde múddeli taraptardyń pikirleri men usynystary jeke-jeke qaralatyn bolady», - dedi «Nur Otan» partııasynyń hatshysy Ilıa Terenchenko.
Aıtýly sharaǵa quzyrly organ ókilderimen qatar, býkmekerlik keńse mamandary qatysty.
«Qumar oıyndy ádetke aınaldyryp oǵan táýeldi bolý, alkogol jáne nashaqorlyqqa táýeldi bolýmen teń. Qumarlyqtyń ózindik belgileri bar. Oıynǵa qumarlyqtan emdelý biraz ýaqyt pen qarjyny talap etedi. Biz arnaıy monıtorıng júrgizdik, onyń nátıjesinde 2015 jyldan beri Almaty qalasynda qumar oıynnyń tuzaǵyna túsken 266 adam kómek surady, Qaraǵandy qalasy boıynsha 2018 jyldan bastap 7 adam jáne Astana boıynsha 2017 jyldan bastap 46 adam qol ushyn sozýǵa ótinish bildirdi», - dedi «Renessans» halyqaralyq qaýymdastyǵynyń dırektory Sergeı Mavlıaev.
Onyń aıtýynsha, qumarlyqtan aryltýǵa arnalǵan saýyqtyrý protsesi 2 aıdan 1 jylǵa deıingi ýaqytty talap etedi jáne bir aılyq emdelý quny shamamen 300 myń teńgeni quraıdy.
Mamandardyń málimetine qaraǵanda, oıyn táýeldiligi Dúnıejúzilik densaýlyq saqtaý uıymynyń dert (aýrý) klassıfıkatoryna engizilginine qaramastan, qumar oıynmen áýestený men onyń qoǵam úshin qaýiptiligin retteýdi zańnamalyq turǵydan jetildirý kerek.
«Sońǵy 4 jyl ishinde oıyn klýbtary men mekemelerine qatysty 234 qylmys jasalǵan, onyń ishinde 81 oıyn mekemesine shabýyl jasaý, 53 tonaý oqıǵasy jáne taǵy basqa. Ústimizdegi jyly qumar oıyndarymen baılanysty 6 qylmys jasaldy. Taǵy bir aıtyp ótetin problema - qumar oıyn mekemeleriniń el aýmaǵynda zańdy túrde tirkelmeýi, osy sebepten bizge olardy baqylaý bizge qıyn. Bizde qumar oıynnyń jetegine ketkenderge qatysty is kóptep qozǵalady. Mysal keltirsek Almaty qalasynda kámelettik jasqa tolmaǵan jasóspirim ata-anasynyń ruqsatynsyz 2 mln teńgeden astam qarjyny býkmekerlik keńsede utysqa salyp nátıjesinde jeńilgen. Sol sekildi ótken jyly Shymkentte qumar oıynda qomaqty utystan aıyrylyp, yzaǵa bólengen azamat óziniń anasyn óltirgen. Osy sekildi derekter jetkilikti», -dedi QR ІІM Ákimshilik polıtsııa komıtetiniń basqarma tóraǵasynyń orynbasary Maqsat Baıbolov.
Uıymdastyrýshylar aldaǵy ýaqytta atalǵan máseleni talqylaý jalǵasa beretinin aıta kele, onyń nátıjesinde jumys toby qurylyp naqty sheshimder qabyldanatynyn málim etti.
