Qumar oıyndar alańyna aınalyp bara jatqan býkmekerlik keńselerdi joıý kerek - R. Shaekın
ASTANA. 28 qazan. QazAqparat - Qumar oıyndar alańyna aınalyp bara jatqan býkmekerlik keńselerdi joıý qajet. Búgin Parlament Májilisinde «Lotereıalar jáne lotereıalar qyzmeti týraly» zań jobasynyń tanystyrylymy barysynda depýtat Raýan Shaekın osylaı málim etti.
Zań jobasynyń tusaýkeseri barysynda sóz alǵan depýtat Raýan Shaekın qujatta kórsetilgen lotereıa naryǵyna ulttyq operator engizýmen tujyrymdamaly túrde kelisýge bolmaıtynyn alǵa tartady. «Ulttyq operator ne úshin kerek? Erteńgi kúni bul operator naryqtaǵy basqa oıynshylardy «tunshyqtyryp», biz salanyń ashyqtyǵyn baqylaı almaı qalamyz. Durysy - zań arqyly bárine birdeı jaǵdaı jasap, báriniń jumysyn ashyq etý», - deıdi depýtat. Onyń paıymynsha, Qazaqstannyń lotereıa naryǵyna ulttyq operator engizý halyqtyń osy salaǵa degen qyzyǵýshylyǵyn arttyra almaıdy. «Qazaq halqynyń týmysynan lotereıa oınaıtyndaı mentalıteti bolǵan joq. Qazaqtar salmaqty, jeńil aqshaǵa joq, qumar oıynǵa da bara bermeıdi. Sondyqtan da, lotereıa naryǵynyń damymaýyn ulttyq operatordyń joqtyǵynan emes, bizdiń mentalıtetimizden kórgenimiz kóńilge qonymdy. Eger shynymen sportqa, qoǵamǵa ıgi is jasaǵymyz kelse, onda bul zańdy qabyldamaı-aq, onyń ornyna eldegi qaptaǵan býkmekerlik keńselerdi joıý kerek. Buryn kazıno men oıyn avtomattaryna ýlanǵandar qazir osy keńselerden shyqpaıtyn boldy. Mine, osylardy qurtý kerek. Sonda ǵana baryp, lotereıaǵa jol ashýǵa bolady dep oılaımyn. Biz lotereıa arqyly ınvestıtsııa salyp, sportty damytýdy qoldaımyz. Alaıda, býkmekerlik keńselerdi qurtpaı turyp, lotereıany damytý áste múmkin emes. Sosyn ıdeologııa jaǵyn da kúsheıtýge tıispiz», - deıdi depýtat R. Shaekın.
Onyń paıymynsha, qazirgi býkmekerlik keńseler qumar oıyndar alańyna aınalyp barady. «Bul eshkimge qupııa emes. Bul - azart oıyndarynyń búrkenshek kórinisi», - dedi ol.
