Qumar oıynǵa táýeldiler esepke alynbaý úshin aılasyn asyryp júr

ASTANA.KAZINFORM – Nashaqorlyq pen qumar oıynǵa táýeldiliktiń aldyn alý, sońǵy úsh jyldaǵy qoldanylyp kele jatqan sharalardyń tıimdiligi jáne táýeldilikke baılanysty quqyqbuzýshylyq statıstıkasy qaraldy. 

– Qazir dıspanserlik esepte 891 adam bar, onyń ishinde 3-i kámeletke tolmaǵan. Bul ótken jylmen salystyrǵanda 8 paıyzǵa tómen. Bıyl alǵash ret 34 adam esepke alyndy, olardyń 19-y sıntetıkalyq esirtki tutynýshylar. Degenmen, alǵash ret esepke alynǵandardyń azaıýy shynaıy jaǵdaıdyń jaqsarǵanyn bildirmeıdi. Bul kóbine medıtsınalyq kómekke júginýdiń tómendigine baılanysty. Sondaı-aq kóptegen adamdar, ásirese oıynǵa táýeldiler, esepke alynýdan qorqyp, anonımdi kómek kórsetetin jekemenshik klınıkalarǵa júginedi. Anonımdiliktiń bolmaýy avtomatty túrde esepke qoıýǵa jáne quqyqtar shektelýine ákeledi, – dedi Álııa Rústemova.

Onyń aıtýynsha, jeke klınıkalardan derekterdi berý tetiginiń zańnamalyq deńgeıde bolmaýy obektıvti statıstıka qalyptastyrýǵa jáne naýqasty baqylaýǵa kedergi keltiredi. Densaýlyq saqtaý mınıstrligi ótken jyldyń jeltoqsanynda konsýltatıvtik baqylaý júrgizýdiń jańa erejelerin bekitken. Bul erejege sáıkes, zııandy paıdalaný – psıhobelsendi zattardy medıtsınalyq emes maqsatta qoldaný saldarynan týyndaıtyn fızıkalyq, psıhıkalyq jáne quqyqtyq máselelerdi qamtıdy, biraq táýeldilik sındromynyń belgileri bolmaıdy. Mundaı naýqastar týraly málimetter RDN (regıstr dıspanserlik naýqastar) júıesine tek statıstıkalyq esep úshin engiziledi jáne olardyń quqyqtyq mártebesine áser etpeıdi. Konsýltatıvtik baqylaýdy qarjylandyrý tetigi áli ázirlenbegen.

– Bıylǵy jyldyń basynan bastap psıhobelsendi zattardy qoldanǵan 360 adam jáne oıynǵa táýeldi 8 adam konsýltatıvtik baqylaýǵa alyndy. Bul dıagnoz jyl boıy baqylaýda bolýdy kózdeıdi. Eger retsıdıv anyqtalsa, patsıent dınamıkalyq baqylaý tobyna aýystyrylady. Jyl ishinde qaıtalanǵan jaǵdaı tirkelip, qanynda psıhobelsendi zattar bar ekeni rastalsa, naýqas avtomatty túrde dıspanserlik esepke qoıylady, – dep atap ótti ol.

Álııa Rústemovanyń pikirinshe, aldaǵy ýaqytta dıspanserlik eseptegi patsıentter sany arta bermek.

Buǵan deıin, elimizde lýdomanııa dıagnozy neshe adamǵa qoıylǵanyn jazǵanbyz.

Sonymen qatar 5 jylda esirtkige táýeldi jandardyń sany azaıǵanyn habarlaǵanbyz.