Qumar oıynǵa salynǵan atyraýlyq áskerı qyzmetshi kórshisin aldaǵany úshin sottaldy
AQTÓBE. KAZINFORM – Sottalýshy tanysynyń kólik alýǵa dep jınaǵan aqshasyn aldap alyp, keıin bás tikken. Sot 2 jyl 8 aıǵa bas bostandyǵynan shekteý jazasyn taǵaıyndady.
Aqtóbe garnızonynyń áskerı sotynda QR UQK Shekara qyzmetiniń Atyraý oblysy boıynsha departamenti atys ornynyń bastyǵy laýazymynda kelisimshart boıynsha jumys istegen Sh.Ásetke qatysty isti qaraldy. Oǵan Qylmystyq kodekstiń «Alaıaqtyq» baby boıynsha aıyp taǵyldy.
Іs materıalyna súıensek, sottalýshy byltyr mamyr aıynda bala kezden beri tanıtyn kórshisimen áńgimelesip, onyń kólik satyp almaq bolǵanyn biledi. Osy kezde paıda tabýdy oılaǵan áskerı qyzmetshi bankte synyptasy jumys isteıtinin, kepilde turǵan kólikti arzanyna satyp alýǵa kómektesetinin aıtty. Aıtqany senimdi shyǵýy úshin áriptesiniń telefony arqyly bank qyzmetkeri bolyp sóılesip, kólikti 4 500 000 teńgege shyǵaryp berýge kelisken. Ári qaraı sottalýshy Sh.Áset kóliktiń aıyppulyn, notarıýs qyzmetin, tehnıkalyq qujattaryn jáne mámileniń ózge de shyǵynyn eseptep, aqshany áriptesteri men týystarynyń shotyna aýdartyp, bir bóligin qolma-qol alǵan. Shyǵyn - 4 500 000 teńge.
Sot kabınetindegi is materıalynda sottalýshy aqshany onlaın oıyndarǵa salyp, bás tikken, óz qajettilikterine jumsaǵany aıtylady. Sot otyrysynda sottalýshy ózine taǵylǵan aıypty tolyq moıyndady. Keltirilgen materıaldyq zalaldy tolyq ótegen.
Sot úkimimen Sh.Áset Qylmystyq kodekstiń «Alaıaqtyq» babymen kináli dep tanylyp, tórt jyl merzimge bas bostandyǵyn shekteý jazasy taǵaıyndaldy. QR «Raqymshylyq jasaý týraly» Zańyna sáıkes túpkilikti 2 jyl 8 aı merzimge bas bostandyǵyn shekteý jazasyna kesildi. Jazanyń barlyq merziminde probatsııalyq baqylaýda bolady. Sot úkimi zańdy kúshine engen joq.
Eske salsaq, Mańǵystaýda áskerı qyzmetshi shartty neke quryp, memleketke 43 mln teńge shyǵyn keltirdi. Sot úkimimen sottalýshy K.Almat Qylmystyq kodekstiń «Alaıaqtyq» baby boıynsha aıypty dep tanylyp, 6 jylǵa bas bostandyǵynan, podpolkovnık sheninen aıyryldy.
