Qumar oıynǵa áýestengen jeti áskerı qyzmetker jumystan qýyldy – mınıstrlik ókili
ASTANA. KAZINFORM — Jyl basynan beri qarýly kúshter qatarynan bás tigip, qumar oıynǵa qyzyqqan jeti áskerı qyzmetker qyzmetinen shettetildi. Bul týraly Qorǵanys mınıstrligi Áskerı polıtsııa bas basqarmasynyń profılaktıka basqarmasynyń bastyǵy Ertaı Eralın málim etti.

— Eger áskerı qyzmetshiler anyqtalsa, olarǵa qatysty shara qoldanyp, jumystan bosatýǵa deıingi jaza qarastyrylǵan. Biz bul taqyrypta turaqty túrde profılaktıkalyq is-sharalar ótkizilip turamyz. Bıyl lýdomanııaǵa baılanysty sýıtsıd faktileri tirkelgen joq. Meniń bilýimshe, 7 áskerı qyzmetshi qumar oıyndarǵa qatysqany úshin qarýly kúshter qatarynan bosatyldy, — dedi Ertaı Eralın Senat qabyrǵasynda ótken is-shara barysynda.
Onyń aıtýynsha, áskerı qyzmetshilerge qatysty zańnamalyq shekteýler byltyr 9 qyrkúıekte kúshine endi jáne qumar oıyndarǵa áýes áskerı qyzmetshilerdi anyqtaý jumystary jalǵasyn tabady.
Aıta keteıik, búgin Senattyń Áleýmettik-mádenı damý jáne ǵylym komıtetiniń depýtattary oıyn bıznesi jáne elimizde lotereıaǵa qatysty qabyldanǵan zańnamaǵa engizilgen ózgeristerdi iske asyrý barysyn talqylady.
Buǵan deıin habarlaǵanymyzdaı elimizde qumar oıynǵa áýes memlekettik qyzmetkerlerdi avtomatty túrde anyqtaıtyn arnaıy júıe ázirlenip jatyr.
Búginde elimizde 350 myń adam qumar oıyndy júıeli túrde oınaıdy.