Qumar oıyndy jarnamalaýǵa tyıym salynady – zań jobasy
ASTANA. KAZINFORM – Búgin Parlament Májilisinde «Qazaqstan Respýblıkasynyń keıbir zańnamalyq aktilerine oıyn bıznesi, lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasy tanystyryldy.
«Qumar oıynnyń bylaısha etek alyp ketýine onyń eshbir tejeýsiz jarnamalanýy da áser etip otyr. Býkmekerlik keńseler jarnamaǵa qomaqty qarajat jumsap jatyr. Telearnalar, resmı ınternet saıttar, Youtube arnalary, Tik-tok, Instagram, Telegram sııaqty áleýmettik jelilerde býkmekerlik keńselerdiń jarnamasy tolyp júr. Sonymen qatar, keıbir qoǵamdyq pikir kóshbasshylary, belgili blogerler, medıa juldyzdar da osy zııandy qubylysty jarnamalap júrgenin bilemiz. Usynylyp otyrǵan zańda qumar oıyndy jarnamalaýǵa da tyıym qarastyrylǵan. Endi osy zań jobasyn taǵy da jan-jaqty pysyqtap, tez arada qabyldaýymyz kerek», - dedi Májilis depýtaty Elnur Beısenbaev.
Onyń aıtýynsha, zań jobasynda maksımaldy túrde býkmekerlik keńseler men kazınolardyń jarnamasyn shekteý eskerilgen. Onda úılerdiń qasbetterinde, fasadtarynda, ǵımarattarda, qurylystardyń qorshaýlarynda, kólik quraldarynda syrtqy jarnamaǵa tyıym salynady. Internet resýrstarynda, resmı saıttarda, telearnalar men radıoda, merzimdi baspa basylymdarynda, kınoda jarnamaǵa tolyq tyıym salynady.
«Oınaý jasyna kelmegen azamattardyń qumar oıyndaryna jáne bás tigýge qatysýy shekteledi. Olarǵa zańsyz oıyn oınaýǵa múmkindik bergen zańdy tulǵalarǵa qomaqty kólemde aıyppul salynady. Budan bólek, onlaın kazıno uıymdastyrýshylarǵa Qylmystyq kodekstiń 307-baby boıynsha jaza qoldanylady», - dedi depýtat.
Qujat aıasynda zańsyz lotomatıkterge múldem tyıym salynady. Oıynda bás tigý jasy 21 jastan 25 jasqa deıin kóteriledi.
Sonymen qatar, balalar, bilim berý, medıtsınalyq, dinı jáne dinı uıymdar ornalasqan turǵyn úıler men ǵımarattarda lotereıa bıletterin taratýǵa jáne lotereıa termınaldaryn ornatýǵa tyıym salynady.
«Sot aktisi negizinde qyzmeti zańsyz dep tanylǵan sheteldik oıyn bıznesin uıymdastyrýshylardyń tizimi júrgizilip, sondaı-aq bankter men tólem júıelerine olardyń paıdasyna qarjylyq operatsııalar júrgizýge tyıym salynady. Munymen qosa, býkmekerlik keńseniń nemese totalızatordyń qyzmetin júzege asyratyn oıyn bıznesin uıymdastyrýshylardyń óz apparattyq-baǵdarlamalyq keshenderiniń Memlekettik kirister organynyń aqparattyq júıelerimen ıntegratsııalanýyn qamtamasyz etý mindeti belgilenedi», - dedi depýtat.
