Qumar oıyndarǵa qatysýǵa tyıym salynatyn azamattardyń tizbesi keńeıtildi – Máýlen Áshimbaev
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý, oıyn bıznesi jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
Zań densaýlyq saqtaý salasyndaǵy zańnamalyq retteýdi jetildirý, oıyn bıznesi salasyndaǵy jarnamalyq qyzmetti retteýdi ońtaılandyrý, qumar oıyndarǵa qatysýdy baqylaýdy kúsheıtý, sondaı-aq mindetti medıtsınalyq saqtandyrý júıesiniń ashyqtyǵyn arttyrý maqsatynda ázirlendi.
Zańnyń mindetteri - memlekettik organdardyń fýnktsııalaryn naqtylaý, densaýlyq saqtaý salasyndaǵy zańnamada qaıtalanatyn normalardy joıý, oıyn bıznesi men jarnamalyq qyzmetti retteýge ózgerister engizý, áleýmettik medıtsınalyq saqtandyrý júıesin jetildirý.
– Bul zań densaýlyq saqtaý salasyn retteıtin zańnamany odan ári jetildirý maqsatymen ázirlengen. Sonyń aıasynda medıtsınalyq qyzmetterdi reglamentteıtin normalar men ýákiletti organnyń jekelegen quzyretteri qaıta qaraldy. Sonymen qatar lýdomanııamen kúresti arttyrýǵa baǵyttalǵan normalar qarastyrylyp, býkmekerlik keńseler men totalızatorlardy jarnamalaý talaptary kúsheıtildi. Qumar oıyndarǵa qatysýǵa tyıym salynatyn azamattardyń tizbesi de keńeıtildi, – dedi Senat tóraǵasy Máýlen Áshimbaev.
Senattyń Áleýmettik-mádenı damý jáne ǵylym komıtetiniń málimetinshe, bul qujat «Halyq densaýlyǵy jáne densaýlyq saqtaý júıesi týraly» Kodeksine, sondaı-aq «Jarnama týraly», «Oıyn bıznesi týraly» jáne «Mindetti áleýmettik medıtsınalyq saqtandyrý týraly» zańdarǵa ózgerister men tolyqtyrýlar engizýdi kózdeıdi.
«Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń Kodeksine mynalardy kózdeıtin ózgerister engizildi:
- ýákiletti organnyń ókilettikterin naqtylaý;
- eskirgen normalardy alyp tastaý;
- múgedektigi joq adamdarǵa estý-protezdik kómek kórsetý týraly erejeler;
- tegin medıtsınalyq kómektiń kepildik berilgen kóleminde onkologııalyq aýrýlardy erte anyqtaýǵa skrınıngtik zertteýler júrgizý;
- atmosferalyq aýanyń jaı-kúıi týraly halyqty buqaralyq aqparat quraldarynda toqsan saıyn habardar etý;
- ýákiletti organnyń qaramaǵyndaǵy densaýlyq saqtaý salasyndaǵy ǵylymı uıymdardyń rezıdentýra baǵdarlamalaryn derbes iske asyrý quqyǵy.
«Jarnama týraly» Zańyna býkmekerlik keńseler men totalızatorlardyń jarnamasyn retteýge, oıyn bıznesi jarnamasyn taratýǵa shekteýlerge qatysty ózgerister engizildi jáne uıaly baılanystyń abonenttik qurylǵylaryna qumar oıyndarynyń jarnamasyn taratýǵa tyıym salatyn normalar engizildi.
«Oıyn bıznesi týraly» Zańyna bas bostandyǵyn shekteýge sottalǵan nemese shartty túrde sottalǵan adamdar úshin qumar oıyndarǵa qatysýǵa tyıym salyndy.
Sonymen qatar, «Mindetti áleýmettik medıtsınalyq saqtandyrý týraly» Zańynda qaıtalanatyn normalar alynyp tastaldy, retteýshi organdardyń ókilettikteri naqtylandy.
Zańnyń qabyldanýy densaýlyq saqtaý salasyndaǵy quqyqtyq retteýdi jeńildetýge, oıyn bıznesiniń halyqqa teris áser etý táýekelderin azaıtýǵa, atalǵan salalardaǵy memlekettik basqarýdyń tıimdiligin arttyrýǵa múmkindik beredi.
Eske salsaq, bıyl naýryz aıynda Týrızm jáne sport vıtse-mınıstri Erjan Erkinbaev elimizde mıllıon lýdoman bar degen aqparatty joqqa shyǵardy.