Qumar oıyn oınaǵan 25 memlekettik qyzmetshi jumystan shyǵaryldy — agenttik
QYZYLORDA. KAZINFORM — Bıylǵy jartyjyldyqta qumar oıyndarǵa qatysty sybaılas jemqorlyqqa qarsy shekteýlerdi saqtamaǵan 25 memlekettik qyzmetshi qyzmetinen bosatyldy. Bul týraly Qyzylordada Memlekettik qyzmet isteri agenttiginiń bastamasymen ótken Ádep jónindegi ýákilderdiń respýblıkalyq forýmynda aıtyldy.
Memlekettik qyzmet isteri agenttiginiń tóraǵasy Darhan Jazyqbaı «Ádiletti Qazaqstan – adal azamat» qaǵıdattaryn memlekettik apparat jumysynda bekem ornyqtyrý – strategııalyq mańyzdy mindet ekenin aıtty.
Bul rette olardyń qumar oıyndarǵa qatysýyn, tyıym salynǵan zattardy qoldaný sııaqty buzýshylyqtardy boldyrmaý, sondaı-aq adaldyq qaǵıdatyna negizdelgen jemqorlyqqa qarsy mádenıetti qalyptastyrýǵa erekshe nazar aýdarý qajet.
Oǵan qosa, memlekettik qyzmetishlerdiń otbasylyq qundylyqtardy saqtaýy da mańyzdy basymdyqtardyń biri bolyp qala bermek.
– Prezıdent Joldaýynda aıtylǵan «Zań jáne tártip» – memleketimizdiń myzǵymas tuǵyry. Qoǵamda osy qaǵıdany túbegeıli ornyqtyrý úshin barlyq quzyrly organdar arasynda ortaq kózqaras pen ortaq ustanym bolýǵa tıis. Bul eń aldymen, eshbir quqyqbuzýshylyqqa jol bermeý qaǵıdasy, ıaǵnı kez kelgen zańsyzdyqqa qarsy turý degen ustanym. Sondyqtan memlekettik organdardyń osy baǵyttaǵy jumysyn barynsha qoldaý qajet.Sonda ǵana elimizde quqyqbuzýshylyqqa, ozbyrlyq pen zorlyq-zombylyqqa qarsy sana-sezim qalyptasady, qoǵamǵa jat kez kelgen áreketke tózbeýshilik paıda bolady, – dedi Darhan Jazyqbaı.
Agenttik tóraǵasynyń aıtýynsha, memlekettik organdarda jańadan Profılaktıka qyzmetin qurý kózdelip otyr. Onyń negizgi mindetteri – jemqorlyqtyń aldyn alý sharalaryn qamtamasyz etý, memlekettik qyzmetterdiń sapasyna ishki baqylaý júrgizý, vedomstvolyq baǵynysty uıymdar qyzmetin, onyń ishinde komplaens-qyzmetterdiń qyzmetin úılestirý bolmaq.
Sondaı-aq, erekshe nazar aýdaratyn mańyzdy ózgeristerdiń biri – qyzmettik tergep-tekserý rásimderiniń ınstıtýtsıonaldyq túrde qaıta qurylýy. Bul rette kadr qyzmetteriniń negizgi mindeti personaldy damytý men tıimdi kadrlyq saıasatty júrgizýge baǵyttalsa, qyzmettik tergep-tekserý jumystaryn uıymdastyrý jáne júrgizý ókilettigi tolyqtaı Profılaktıka qyzmetine beriledi.
Bul ózgerister jańa Zań jobasynda naqty qarastyrylǵan, ony iske asyrýda Ádep jónindegi ýákilder jetekshi ról atqarady. Olar agenttiktiń ókilderi retinde memlekettik organdarǵa issaparǵa jiberiledi.
Sonymen birge, bul forýmda jańartylǵan ant mátini de talqylandy. Onda memlekettik qyzmetshini tek quqyqtyq ǵana emes, moraldyq mindetter de júktelgen memlekettiń ókili retinde aıqyndalǵan.
Forýmǵa qatysýshylar Ádep jónindegi ýákilderdiń derbestigin kúsheıtýge jáne olarǵa júkteletin mindetterdi tıimdi oryndaý tetikterine qatysty oılaryn ortaǵa saldy. Qazirgi tańda respýblıka boıynsha memlekettik organdarda 770 Ádep jónindegi ýákil qyzmet etedi.
Aıta keteıik, memlekettik qyzmetke ornalasýdy barynsha jeńildetý sharalary nátıjesinde joǵary oqý ornyn jaqsy kórsetkishpen aıaqtaǵan 588 túlek aýdandyq jáne aýyldyq jerlerde tómengi laýazymdarǵa konkýrssyz qabyldanyp, eńbek etip júr.
Kelesi jyldan bastap memlekettik qyzmetshiler jumysqa tek onlaın qabyldanady. «E-Qyzmet» jáne «Biryńǵaı kadr júıesi» portaldary irikteýde ashyqtyqty qamtamasyz etip, adamı faktorǵa jol bermeıdi.