Qumar Aqsaqalov jolaýshylar tasymalyndaǵy kóleńkeli bıznespen qalaı kúrespek
PETROPAVL. QazAqparat – Petropavl qalasynyń avtoparkteri jolaýshylar aǵynyn úsh esege deıin azaıtyp kórsetken, dep habarlaıdy «QazAqparat» tilshisi.
SQO ákimdiginiń baspasóz qyzmetinen málim etkendeı, Petropavlda qoǵamdyq tasymalmen aınalysatyn kásiporyndar jolaýshylar sanyn 3 esege deıin azaıtyp kórsetip kelgen. Bul, arnaıy tekseristiń nátıjesinde belgili boldy. Jergilikti bılik qala turǵyndary kóp qoldanatyn jáne kerisinshe, suranysy az eki avtobýs baǵytyna monıtorıng júrgizdi. Reıd jumys kúnderi uıymdastyrylǵan. Tasymaldaýshylardyń kúnine 2 myń adam qatynaıtyny týraly aqparat shyndyqqa janaspaıtyn bolyp shyqty. Oblys ákimi Qumar Aqsaqalovtyń pikirinshe, kóleńkeli ekonomıkamen aınalysatyndardy áshkereleýde tsıfrlandyrýdyń bereri mol.
«Elektrondyq bıletter máseleni sheshe alady. Osynyń arqasynda naqty jolaýshylardyń sanyn bilip, kóleńkeli kiristi joıa alamyz. Tsıfrlandyrýmen qatar, avtobýs parkin de jańartý kerek. Kelesi jyly 100 jańa avtobýsty satyp alýdy josparlap otyrmyz. Qazir bul máseleni sheshýdiń amaldaryn qarastyryp jatyrmyz», - dedi Qumar Aqsaqalov.
Qazirgi ýaqytta oblys ortalyǵynda qoǵamdyq kólikter 24 baǵyt boıynsha júredi. Jolaýshylar tasymalyna 280 avtobýs tartylǵan. Olardyń qozǵalysyn mobıldik qosymshany paıdalana otyryp, GPS-navıgatsııa arqyly baqylaýǵa bolady. 29 aıaldama pavılony qoǵamdyq kóliktiń baǵytyn jáne júrý kestesin kórsetetin elektrondyq taqtamen qamtyldy. 2, 4A, 4T, 14 jáne 25M baǵyttaryndaǵy 60 avtobýsta QR-kod arqyly elektrondyq túrde jol aqysyn tóleýge múmkindik bar.
Al jergilikti bılik qazir qalǵan avtobýs baǵyttaryn tekserip, jolaýshylardyń naqty sanyn anyqtap jatyr.
