Qumar Aqsaqalov joǵary lıgaǵa shyqqan fýtbol komandasyn marapattady
PETROPAVL. QazAqparat – Petropavlda fýtboldan QR birinshi lıga jeńimpazdary - «Qyzyl-jar SQ» komandasy saltanatty túrde marapattaldy, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, jeńimpazdarǵa altyn medaldi óńir basshysy Qumar Aqsaqalov, Qazaqstan fýtbol federatsııasy prezıdentiniń keńesshisi Seıilda Baıshaqov jáne SQO Qurmetti azamaty Aleksandr Lıpovoı tabys etti.
SQO ákimi aıaqdop sheberlerin, jattyqtyrýshylardy jáne olardyń jankúıerlerin jeńispen quttyqtap, bolashaqqa minetter júktedi.
«Bul – bizdiń óńirde fýtboldy damytyp, qalyptastyrýdyń tek alǵashqy qadamy. Joǵary lıgaǵa shyǵý bir bólek te, onda jaqsy nátıje kórsetip oınaý – bul sheberlikti qajet etedi. Ol jerde bizdiń komanda el úzdikterimen oınaıdy. Jarmasyp, múmkindikti qalt jibermeý qajet. Jankúıerlerińiz sizderge zor úmit artyp otyr, aqtańyzdar, jerge qaratpańyzdar», - dedi Qumar Aqsaqalov.
Óńir basshysynyń pikirinshe, jergilikti klýbtyń jetistigi balalar fýtbolynyń damý deńgeıine tikeleı táýeldi.
«Balalar men jasóspirimder fýtboly jaqsy jolǵa qoıylmaıynsha sporttyń bul túrin damytý óte qıyn. Biz barlyq aýdan ortalyqtarynda jasandy tósemesi bar fýtbol alańdaryn ashamyz. Qazir úsh aýdanda osyndaı alań bar. Kelesi jyly Saýmalkólde salamyz. Aldaǵy 2-3 jylda bul jumysty bitiremiz. Bul bizge dástúrli túrde oblystyq chempıonatty ótkizip turýǵa múmkindik beredi. Sondaı-aq sport kolledjinde arnaıy mamandyq ashamyz», - dedi oblys ákimi.
