Qumar Aqsaqalov: SQO-da sý basqan eldi mekender joq
PETROPAVL. QazAqparat – Soltústik Qazaqstan oblysynda qaýipti indetpen kúresten bólek kóktemgi sý tasqynyna qarsy is-sharalar da únemi nazarda. Óńir basshysy Qumar Aqsaqalov osy oraıda atqarylyp jatqan jumystar jaıynda baıandady, dep habarlaıdy QazAqparat tilshisi.
SQO ákimi Qumar Aqsaqalovtyń aıtýynsha, óńirde bıyl da kóktemgi sý tasqyny kúrdeli ótpek. Apattyń aldyn alýǵa kóp adam jumyldyryldy. Mamandar men tehnıka aldyn ala ázirlendi.
«Oblysta sý kirgen, tasqyn sýdan zardap shekken eldi meken joq. Ózender, kólder men sý qoımalaryndaǵy sý deńgeıi kúndelikti baqylaýǵa alynǵan. Sý basý qaýpi joǵary Ýálıhanov, Aıyrtaý, Tımırıazev jáne Ǵ.Músirepov aýdandaryna tıisti jumystardy júrgizý úshin qutqarýshylar aldyn ala attandy. Ótken jyldardy saralaı kele tórt myńnan astam sharshy metrdi alatyn 12 ýchaskede jarylys jumystary júrgizildi», - dedi Qumar Aqsaqalov.
Óńirde 100 km artyq aryqtar men kanaldar tazartyldy, 100 myń tekshe metrden astam erigen qar sýy sorǵylarmen soryldy. Avtojoldar men eldi mekenderdegi 3 myńnan astam sý ótkizgish qubyrlar tazalanyp, aýyldarǵa sý jibermeý maqsatynda 20 km qorǵanysh bógeti salyndy.
