Qumar Aqsaqalov Shymkentte soltústikke kóshý baǵdarlamasynyń utymdy tustaryn tanystyrdy
«Ońtústikten soltústikke kóshý» baǵdarlamasy 2013 jyly qabyldanǵan «Jumyspen qamtý 2020 jol kartasy» baǵdarlamasy negizinde júzege asyrylyp jatyr. Maqsat - soltústik pen shyǵystaǵy jumys kúshi tapshy aımaqtarǵa ońtústiktegi «jumys kúshi artyq» oblystardan halyqty kóshirý.
Baǵdarlama búginde qarqyndy júzege asýda. Respýblıkanyń Soltústik oblystaryna óz erkimen barǵysy keletinderge memleketten sýbsıdııa, odan bólek kóptegen jeńildikter qarastyrylǵan. Baǵdarlamanyń halyq úshin ońtaıly tustaryn túsindirýge arnaıy kelgen SQO ákimi Qumar Aqsaqalov Shymkent ákimi Ǵabıdýlla Ábdirahymovpen jáne qala turǵyndarymen kezdesti.
2016 jyly elimizdiń ózge óńirlerinen Soltústik Qazaqstan oblysyna 125 otbasy - 546 azamat qonys aýdardy. Olarǵa 63 eldi mekennen baspana berilip, eńbekke jaramdy azamattar jumyspen qamtyldy. Al, byltyr Qyzyljar óńirine 376 azamat nemese 81 otbasy kóship keldi. Bıyl jyl basynan beri 196 otbasy, ıaǵnı, 682 turǵyn ońtústikten soltústikke qonys aýdardy.
«Biraz adam kóship keldi. Ol jaqqa barsańyzdar biraz aǵaıyndaryńyzdy tabasyzdar. Bıznesterin ashqan azamattar, jetistikke jetken azamattar az emes. Úkimet berip otyrǵan múmkindikti jaqsy paıdalanyp, bıznesterin ashty. Keıbir máseleler bar, árıne, kepildik jóninde, nesıeleý jóninde. Ol máseleni sheshýdiń mehanızmin tabýǵa bolady», dedi shymkenttiktermen kezdesken SQO ákimi Qumar Aqsaqalov.
Túrkistan oblysynan bıyl qonys aýdarǵan 263 otbasynyń 63-i Qostanaı oblysyna, 50 otbasy Shyǵys Qazaqstanǵa qonys aýdarsa, 43 januıa Soltústik Qazaqstandy tańdaǵan. 107 otbasy Pavlodar oblysynda tútin tútetip jatyr.
«Qazaqstan - bizdiń keń baıtaq jerimiz. Árbir sharshy metri - ol bizdiń jerimiz. Elbasymyz da aıtty ǵoı, halyq mobıldi bolýy kerek. Amerıkada da Nıý Iorkta turyp, San-Frantsıskoǵa baryp, jumysty qatynap isteıdi. Soltústik Qazaqstanda jer óte qunarly, aýyl sharýashylyǵynda júrgen bizdiń biraz azamattar baryp, jer alsa, kartop egip, basqa nárselerdi egip, mal asyraýǵa jaǵdaı jasalatyn bolsa, ol jaqqa baram degen azamattar kóp bolady», - deıdi Shymkent qalasynyń ákimi Ǵabıdýlla Ábdirahymov.
Mamandardyń esebinshe, Soltústik Qazaqstan oblysynda 1031 bos jumys orny bar. Ózge óńirden teriskeıge qonys aýdarǵandardy 224 eldimeken qabyldaı alady.
«Biz - agrarly óńirmiz. Sondyqtan ekonomıkanyń negizgi salasy - aýyl sharýashylyǵy. Qazir oblysta jańa tehnıka óte kóp, 1 kombaıyn shamamen 100 mln teńge turady, sebý kesheni bar traktordyń quny - 30 myń AQSh dollary. Sol sebepti, aýyl sharýashylyǵynda eńbek etkisi kelgen adamnyń daıyndyǵy bolý kerek. Búginde aýyl sharýashylyǵy ónimin óndirýshiler jumys isteýge kelgen adamnyń búgin istep, erteń ketip qalmaıtynyna senimdi bolǵysy keledi. Bizge ýaqytsha qonys aýdarýshylar emes, turaqty turǵyndar kerek», - deıdi SQO Qumar Aqsaqalov.
Qyzyljar óńirine ózge oblystardan qonys aýdarǵan otbasylarǵa meıilinshe kómek kórsetilip keledi. Olardyń jolaqysy tolyqtaı ótelip, úı-jaımen, jumyspen qamtylýda. Sondaı-aq, otbasynyń ár múshesine 35 eseptik aılyq mólsherinde kótermeaqy tólenip jatyr.