Qumar Aqsaqalov paramen ustalǵan basqarma basshysyna qatysty pikir bildirdi
"Ókinishke qaraı, ondaı oqıǵa boldy. Kúni keshe ol jaıynda xabar taratyldy. Oǵan deıin memlekettik sáýlet-qurylys salasyndaǵy baqylaý basqarmasynyń basshysy qamaýǵa alynǵan bolatyn. Ashyǵyn aıtý kerek, búginde qurylys salasynda sybaılas jemqorlyq bar", - dedi Q.Aqsaqalov Astanada ótken baspasóz máslıxatynda.
Ákimniń aıtýynsha, qurylys salasyndaǵy jemqorlyqty barynsha azaıtý úshin barlyq protsesterdi avtomattandyrý qajet. Sonda adamdar arasynda tikeleı baılanys bolmaıdy. Áıtpese, ruqsat qaǵazdary bar jerde para da, jemqorlyq ta órship turady.
"Bylaı bolýy kerek, adam qujat tapsyrdy ma, arǵy jaǵynda otyrǵandar birden qarap shyǵýy tıis. Barlyq qujattar bar ma? Boldy. Ruqsat qaǵazdary avtomatty túrde berilýi kerek. Sonda jemqorlyq ta bolmaıdy. Qazirgi kezde memlekettik qyzmetterdiń 44 protsenti avtomattandyrylǵan. Bizdiń maqsatamyz - ol kórsetkishti 100 protsentke jetkizý. Sol kezde biz sybaılas jemqorlyqty azaıta alamyz", - dep atap kórsetti Q.Aqsaqalov.
Aıta keteıik, keshe QR Memlekettik qyzmet isteri jáne sybaılas jemqorlyqqa qarsy kúres agenttigi Soltústik Qazaqstan oblystyq memlekettik sáýlet jáne qurylys salasyndaǵy baqylaý basqarmasy basshysynyń 300 myń teńgemen ustalǵany jaıynda xabarlady.