Qumar Aqsaqalov Qostanaıdaǵy qýańshylyq saldarymen qalaı kúresip jatyr

Qostanaı oblysynyń ákimi Qumar Aqsaqalov óńirdegi qýańshylyq saldarymen qalaı kúresip jatqanyn aıtty, dep habarlaıdy Kazinform.

«Keıingi birneshe jylda Qostanaı oblysynyń aýmaǵynda qýańshylyq boldy. Bizdiń bilýimizshe, osy qurǵaq jyldar aýyl sharýashylyǵynyń damýyna qatty áser etken. Keleshekte osyndaı tegeýrinniń aldyn alý úshin ne istelip jatyr?», – dep surady jýrnalıst Ortalyq kommýnıkatsııalar qyzmetinde ótken brıfıngte.

Ákimniń aıtýynsha, Qostanaı óńiriniń halqy áli de klımattyń ózgerisin tikeleı sezinip keledi.

«Mysaly, keıingi bes jylda Qostanaı oblysynyń aýmaǵynda qurǵaqshylyq boldy. Ásirese 2019 jáne 2021 jyldar óte qurǵaq boldy. 2023 jyly kerisinshe, jer-kókti sý aldy. Tamyz, qyrkúıek aılarynda 180 mıllımetr jaýyn-shashyn tústi. Bul kópjyldyq ortasha normadan 2,5 ese kóp. Árıne, bul bıdaı sapasyna áser etti. Sondyqtan qazir kásipkerlerdi ylǵal únemdeıtin tehnologııa qoldanýdy nasıhattaýǵa áýre bolyp jatqan joqpyz. Olardyń «aýzy kúıdi». Ózderi-aq ylǵal únemdeıtin tehnologııalardy qoldanyp jatyr. Bizdegi alqaptyń 2 mln gektaryna ylǵal únemdeý tásilderi qoldanylady. Ol tehnologııalar qystan bastap, qar túsken kezden bastalýy kerek. Bul qarapaıym tehnologııalar», – dedi Qumar Aqsaqalov.

Óńir basshysy óńirde sýarmaly jerdi ıgerýge kóńil bólinetinin eske saldy.

«Sondaı-aq sýarmaly jerlermen de jumys isteý kerek. Ázirge sýarmaly alqaptyń aýdany 7 myń gektardy alyp jatyr. Osy aýdandy keminde eki ese arttyrý kerek. Osyndaı josparymyz bar jáne memleket sýarmaly jer ıgeretin sharýalardyń shyǵynyn jeńildetetin sharalar qoldanyp jatyr», – dedi oblys ákimi.